Lotnolas-valáštallan veterána Håvard Klemetsen (36) ii birgen nuorra gándda Jarl Riiber (18) vuostá, dán áigodaga vuosttaš lotnolasnjuikengilvvus mannan duorastaga. Dat lea finnmárkulačča mielas áibbas ortnegis.
Lotnolas-valáštallan veterána Håvard Klemetsen (36) ii birgen nuorra gándda Jarl Riiber (18) vuostá, dán áigodaga vuosttaš lotnolasnjuikengilvvus mannan duorastaga. Dat lea finnmárkulačča mielas áibbas ortnegis.
Guovdageaidnulaš Håvard Klemetsen lea maŋimuš jagiid leamaš buoremus njuikejeaddji Norgga lotnolasvaláštallan riikkajoavkkus. Dán jagáš áigodaga álgu, goittot čájeha ahte 36-jahkásaš árvideames šaddá garrasit rahčat jus áiggoš bajimusas bissut.
Klemetsen oainnát vuoittáhalai garrasit Norgga meašttirgilvvuid (NM) vuosttaš oasis Midstubakkenis duorastaga, čuoigamis maid bođii nubbin mollii.
18-jahkásaš Jarl Riiber lei olles 42 sekundda ovddabealde Klemetsena ovdal go lávvardaga čuoigaledje čuoiganoasis, Beitostølenis.
– Soaitá orrot veaháš ártet, muhto mun lean duođaid ilus go Jarl njuiku nie bures go dahká. Mun lean váillahan eambbosiid geat sáhttet váldet ovddasvástádusa njuikenoasis, dajai Klemetsen ovdal čuoigamiid.
Lávvardaga vuittii ge Jarl Riiber maiddái čuoigamiid, Håvard Klemetsen ja Jan Schmid geahččaleigga joksat nuorra albmá, muhto eaba lihkostuvvan.
Klemetsen faskii silbba ja ollii mollii 14 sekundda maŋŋil Riibera. Magnus Krog faskii ges bronssa.
Inspirerejuvvo
Klemetsen muitala ahte jurddašeaddji 18-jahkásaš inspirere su.
– Juste dál lea Jarl buoremus njuikejeaddji mis. Dasa lassin časkkii maid spesiálanjuikejeddjiid gieskat. Norgga lotnolasvaláštallit hárjehallit máŋgasiin geain lea erenoamáš njuikenmáhttu ja go oainnán mo Jarl njuike de dat movttiidahttá mu hirbmadit.
Juolggit lossadat dego geađggit
Håvard Klemetsen lea dán jagi, nu mo diibmá, ráhkkanan šaddat vel buorebun čuoiganláhttus. 18 beaivvi guhko čoahkkaneapmi Val Senales allaeatnamiin fárrolaga čuigiiguin, lea leamaš ávkin, muhto Klemetsen mieđiha ahte rumaš lea bargan. Dál lea ge guokte vahkku dassái go máilmmecupa álggahuvvo Suomas.
– Juolggit leat lossadat dego geađggit dál. Muhto mun dovddan ahte ovdánan plána mielde, ja mus lea áigumuš álggahit áigodaga buorebut go diibmá dahken, dadjá son.
Dalle gárttai Klemetsen 22:in, vuosttaš njuikemis Kuusamo stuorámus luohkás.
– Njuiken ii leat doarvái buorre dál, muhto lea rivttes guvlui mannamin, lohpida son.
