Lea vuosttaš geardde golmma jagis go Melodi Grand Prix lávlla beassá Norgga almmolaš musihkkalistui.
Lea vuosttaš geardde golmma jagis go Melodi Grand Prix lávlla beassá Norgga almmolaš musihkkalistui.
Grand Prix-lávlagiid vajálduhttet olbmot dávjá, iige leat nu dábálaš ahte vuoitolávlla beassá Norgga almmolaš musihkkalistui, VG-listui. Diimmá lávlla, «A Monster Like Me» man Mørland ja Debrah Scarlett lávlluiga, ii ollen goasse VG-listui. Ii ovddit jagi lávllage, «Silent Storm», man Carl Espen lávllui, beassan VG-listui.
Njuolga 11. sadjái
Agnete Johnsen (21) gal beassá dál čevllohallat. Su lávlla, «Icebreaker», beasai njuolga 11. sadjái.
– Hui somá. Lea vuosttaš geardde go mun lean beassan VG-listui soloartistan. Lea hui earenoamáš munnje go juste «Icebreaker» lea listtus, go dat lávlla mearkkaša hui olu munnje. Mun nu illudan go olbmot guldalit ja ostet mu lávlagiid, Lohká Agnete Johnsen VG:i.
Blacksheeps bajimusas
2008:s beasai son joavkkuin Blacksheeps vuosttaš sadjái lávlagiin «Oro jaska beana», mainna vuite Melodi Grand Prix jr.
– Dat lei hui jáhkkemeahttun. eat mii várra áibbas ipmirdan mii VG-listu obage lea. Mánát han mii leimmet geat dušše háliideimmet čuojahit konsearttain. Lean easkka dál duođas ipmirdan man stuora dáhpáhus lei, lohká son VG:i.
Lihkolaš dál
Maŋŋel go Agnete vuittii Melodi Grand Prix lea son leamašan ruovttus Unjárggas bearraša ja ustibiid luhtte.
– Mun lean nu lihkolaš juste dál ahte in báljo dieđe maid galggan, boagusta son, ja lohká VG:i ahte son galgá bures ráhkkanan go lávke ESC lávdái go galgá lávlut semifinálas Ruoŧas miessemánu 12. beaivvi.
– Mun háliidivččen Stockholmii dál ovttatmano!
