-Almmuhus-
OĐĐASATAgnete Johnsen oažžu bálkkašumi iežas rabasvuođa ovddas

Agnete Johnsen oažžu bálkkašumi iežas rabasvuođa ovddas

-

-

Agnete Johnsen rámiduvvo go lea rahpasit muitalan iežas psyhkalaš váttuid birra ja son oažžu dán jagáš Rabasvuođabálkkašumi.

Unjárgalaš Agnete Johnsen lea dušše 22 jagi boaris ja lea máŋggaid jagiid jo leamaš almmolaš olmmoš. 2008:s vuittii son Norgga ja Davviriikkaid Melodi Grand Prix junior finála go lávllui The BlackSheeps joavkkus.

 

Muitalii rahpasit

Diibmá lei mielde «71 grader nord» prográmmas TV-Norggas go geassádii oassálastimis, ja rahpasit muitalii ahte lea guhkit áigge bártidan psyhkalaš váttuiguin ja lossamielain.

Maiddái dán jagi, go vuittii Norgga finála Melodi Grand Prix finála, de muitalii ahte sus leat psyhkalaš váttut, ja ahte šaddá garra hástalussan oassálastit viidáset.

– Agnete čájeha vuoimmi rabasvuođain iežas váttuid birra, ja hupmá dan birra mii lea bávččas go lea bávččas, muitala Mental Helse stivralahttu Kristian Haugland.

 

Dehálaš hupmat

– Ollugiidda lea ain tabu hupmat iežas psyhkalaš dearvvašvuođa birra. Go čájeha eanet rabasvuođa mediakanálain, de sáhttá unnidit psyhkalaš buozalmasvuođa stigmatiserema ja veahkehit earáid váldit oktavuođa bearrašiin, olbmáiguin ja fágaolbmuiguin, ja muitalit ahte sii rahčet, muitala Haugland preassadieđáhusas.

– Lea hui dehálaš hupmat dan birra go lea lossat. Maŋŋil sáhttá leat beare maŋŋit, dadjá Psyhkalaš dearvvašvuođa Máilmmibeaivvi prošeaktajođiheaddji Le Hang Duong.

 

Dáidda ja ruhtaskeaŋka

Rabasvuođabálkkašumi vuoiti oažžu dáidaga ja 10 000 ruvdnosaš skeaŋkagoartta man vuoiti beassá skeŋket viidáset. Agnete Johnsen lea válljen skeŋket skeaŋkagoartta Čáhcesullo nuoraidguovddážii go dat lea guovddáš Finnmárkkus mii addá veahki ja fuola gaskal 13- ja 18-jahkásaš nuoraide geat rahčet eará olbmuiguin ovttastallat. (©NTB)

-Almmuhus-