– Agenda Nord-Norge ii váldde vuhtii sámi guovlluid

Agenda Sápmi namma vuolgá das go Guovdageainnu suohkana sátnejođiheaddji mielas lea eahpevuoiggalaš dat go Romssas dollojuvvui Agenda Nord-Norge ealáhuskonferánsa.

– Mun dovddan dat ii lean min konferánsa, min geat orrut dáppe. Stuorra aktevrrat mat dávjá lulde bohtet ja lulli politihkkarat geat hupmet min guovllu birra, lohká sátnejođiheaddji dasa manin lea dárbu dákkár ealáhuskonferánsii.

– Agenda Sápmi lea earalágan

Agenda Nord-Norge lea deaivvadanarena ealáhusdolliide mat deaivvadit oktii jagis. Dasa servet Davvi-Norgga stuorámus ealáhusaktevrrat sihke priváhta ja stáhta sektoris. Agenda Nord-Norge ealáhuskonferánsa dollojuvvui vuosttaš háve Romssas skábmamánu 10. ja 11. beaivvi 2014, ja dasto dát dollojuvvui Bådådjos skábmamánu 2. ja 3. beaivvi ja plánejuvvo dán jagi lágiduvvot Álttás Finnmárkkus.

– Agenda Sápmi lea veahá earalágan, mo mii ieža háliidit iežamet guovllu ovdánit, joatká iežas jurdaga Johan Vasara.

Jahkásaš dáhpáhus

Guovdageainnu sátnejođiheaddji Johan Vasara jo ođđajagemánus humai dán birra ahte suohkanis leat áigumušat cegget ealáhusfierpmádaga go doalai bargodeaivvadeami Finnmark Rein fitnodagain. Moadde mánu maŋŋel, cuoŋománu 5. beaivvi, go Ávvir deaivvadii sátnejođiheddjiin su kantuvrras, de Vasara lea eambbo duostil ja eambbo hubmái.

– Jurdda lea oažžut jahkásaš konferánssa, ahte šaddá juohke giđa Agenda Sápmi ealáhuskonferánsa Guovdageainnus. Bargat dan ovdii ahte sihke Agenda Sápmi ja Guovdageaidnu begget viidát.

Viiddis listtu

Agenda Sápmi dáhpáhusa oassálastin leat davviregiovnna aktevrrat nu mo Álttá ja Kárášjoga suohkanat, Norgga Sámedikki, Finnmárkku fylkkagielda, Innovašuvdna Norga, Nord-Norsk reiseliv AS ja Norgga Ealáhusdepartemeanta. Báikkálaš dásis čájehedje beroštumi Juhls Silbagalleija, Thon hotealla ja Finnmark Rein fitnodagat.

– Maiddái iskkaimet Suoma beale akteavrraid gos sáhttit viežžat buriid ovdamearkkaid mo lihkostuvvat bures ealáhuspolitihkain, mo oažžut bargosajiid ja mat leat hutkát luonddu ektui, čilge Vasara.

– Ii galgga geavvat nu mo Suoma bealde

Guovdageainnu suohkanis lea áigumuš doallat dáhpáhusa Sámi guovddážis. Dat galgá leat sihke oassálastilisttu dáfus ja maid digaštallamis. Muhto dál vuos ii loga sáhttit dadjat nu ollu mo oažžut dáhpáhussii olles Sámi perspektiiva ja sisdoalu.

– Dát lea boahtteáigi mis, dál vuos lágidit dán jagi vuosttaš konferánssa ja bargat dan ovdii ahte dás lea čielga agenda Sápmái. Muhto jus humadit mátkeealáhusa birra, de dies ii galgga geavvat nu mo Suoma bealde, go boastut atnet sámi kultuvrra.

– Oainnán ahte hotealla galgá leat dievva

Dáhpáhusa lágidit go háliidit atnit konferánssa oktasaš deaivvadanarenan, hukset fierpmádaga, iskat vejolašvuođaid searvat Sámi ealáhusgárdái, mas sihke stuorát ja uhcit ealáhusdoallit galget juogadit vásáhusaid, oahppat nubbi nuppis. Muhto praktihkalaččat dás berre ávki earret eará báikkálaččat ja báikkálaš ealáhusdolliide.

– Jurdda lea oažžut stuorra aktevrraid olggobealde Guovdageainnu mat deaivvadit min ealáhusaktevrraiguin, ja fállat vaikko sidjiide ásahit juoidá Guovdageidnui. Mun dieđán ahte

Áltái bohtet stuorra fatnasa mielde 2-3000 guossi, ja jus doppe oažžut juobe 10 proseantta dáin gussiin, de dievihit orrunbáikkit mis dáppe Guovdageainnus. Dát lea okta ovdamearka.

Positiiva jurdagii

Guovdageainnu ealáhussearvvi jođiheaddji ii leat gullan Agenda Sámi ovdal go Ávvir válddii suinna oktavuođa, muhto lea positiiva jurdagii.

– Buorre go suohkan váldá ovddasvástádusa ealáhusas, vástida oanehaččat Jan Ole Buljo, gii lea jođihan searvvi 2013 rájes. Searvvis leat 30 miellahtu, ealáhusaktevrra.

Vasara lohká sus leat plánat gulaskuddat konferánssa birra ealáhusservviin ja gullat doppe vel rávvagiid ja vásáhusaid.

Agenda Sápmi lágiduvvo Guovdageainnu Thon hotellas miessemánu 25. ja 26. beaivvi.