Muhtin nissonolbmot šaddet vuordit guhká ovdal go ožžot vástádusa goaŧŧočottaiskadeapmái. – Dát dáhpáhuvvá earret eará danin go muhtimat čađahit iskosa dávjjit go dárbbahuvvo, lohká váldodoavttir Lars Helgeland.
Bealli Norgga buohcceviesuin, mat analyserejit goaŧŧočottaiskkademiid, dieđihit ahte sis leat hástalusat doaimmahit barggu, muitala TV2.
Nissonolbmot berrejit oažžut vástádusa goaŧŧočottaiskkadeapmái golmma vahkku siste, ávžžuha Goaŧŧočottaprográmma. Dán eai nákce buot buohcceviesuin doallat. St. Olavs hospitala vástidanáigi lea birrasii gávcci vahkku ja Helgelánddabuohcceviesus ges ádjánit njeallje vahkku vástidit. Haukeland universitehtabuohcceviesus lea guhkimus vástádusáigi, 14 vahkku.
– Lea dohkketmeahttun vuordit nu guhká, lohká Borasdávdasearvvi váldočálli Ingrid Stenstadvoll Ross.
Iskkahit menddo dávjá
Haukeland universitehtabuohcceviesu patologiijaváldodoavttir Lars Helgeland dadjá ahte iskosat mat galget analyserejuvvot čoggojit dávjá danin go muhtin ráje nissonolbmot válddihit goaŧŧočottaiskosa dávjjit go dárbbahuvvo.
– Go buohtastahttá diimmá loguiguin, de lassánedje iskosat birrasii 30 proseanttain dán jagi guokte álgománu, lohká son.
Borasdávdasearvvi váldočálli oaivvilda ahte nissonat berrejit váldit ovddasvástádusa dán ektui.
– Fina fástadoaktára luhtte válddihit iskosa go Goaŧŧočottaprográmma sádde gohččuma. Ale fina olu dávjjit go das leat váikkuhusat vuogádahkii, lohká Stenstadvoll Ross. (©NTB)
