-Almmuhus-
OĐĐASAT Addet saji ođđa ofelaččaide Márkomeannus

Addet saji ođđa ofelaččaide Márkomeannus

-

-

Dán jagi ledje 19 nuora geat háliidedje šaddat ođđa Sámi ofelažžan. Njealjis dáin leat válljejuvvon doaibmat ofelažžan boahtte skuvlajagi.

Ođđa ofelaččat almmuhuvvojit Márkomeannu festiválas Evenášši suohkanis, bearjadaga suoidnemánu 26. beaivvi dii.19.

– Boađe fal almmuheapmái, šaddá šovva ja beasat vel oahpásmuvvat daid ođđa ofelaččaiguin, dadjá Maria Gunilla Påve Wilks, Sámi ofelaš skuvlajagi 2018/2019.

 

Lea giitevaš

Sii leat jagi leamaš ofelaččat, ja bearjadaga galget Maria Gunilla Påve Wilks, Vanja Tørresdal, Elle Karen Inga Skum ja Eli Karianne Vesterheim Hætta addit doaimma ođđa ofelaččaide.

–      Mun lean hui giitevaš go dán jagi lean vásihan. Lean ožžon máŋga ođđa vejolašvuođa. Ođđa ofelaččat gal duođaid besset illudit, dadjá Eli Karianne Vesterheim Hætta, Sámi ofelaš skuvlajagi 2018/2019.

 

Čiegusin geat leat

Maŋŋel almmuheami láidestit ofelaččat festiválaguldaleddjiid Márkomeannu eahketprográmma čađa. Lávvardaga dahket ođđa ofelaččat dan seammá.

– Šaddá hui speantta deaivat ođđa ofelaččaid, illudan hirbmadit. Mii eatge vel dieđe geat sii leat, dadjá Elle Karen Inga Skum, Sámi ofelaš skuvlajagi 2018/2019.

 

Stáhtačálli boahtá

Departemeantta bealis oassálastá stáhtačálli Anne Karin Olli almmuheapmái.

Sámi ofelaččaid doaimmaha Sámi allaskuvla ja Gieldda- ja ođasmahttindepartemeanta (KMD) ruhtada doaimma. Ofelaččat čađahit oahpu «Samisk kultur- og samfunnskunnskap».

Dasto mátkkoštišgohtet joatkkaskuvllaide ja eará nuoraiddeaivvademiide olles Norggas.

Sin váldoulbmil lea muitalit sámi kultuvrra ja servodaga birra eará nuoraide Norggas, čállá Sámi Allaskuvla preassadieđáhusas.

 

- Advertisement -
-Almmuhus-