Eanan- ja meahccedoalloministeriija addá lobi báhčit gávcci geatkki davve- ja nuortaboazodoalloguovllus Suomas.
Eanan- ja meahccedoalloministeriija addá lobi báhčit gávcci geatkki davve- ja nuortaboazodoalloguovllus Suomas.
Getkkiid ráddjejuvvon bivdolohpi addojuvvo jus geatkkit leat goddán bohccuid dan guovllus guokte jagi maŋŋálaga.
Ásahus lea boahtán fápmui ovddit vahkku, čállá Enontekiön Sanomat.
Lassánan nálli
Luondduriggodatguovddáš árvvoštallá Suomas leat sullii 220–250 geatkki. Geatkenálli lea lassánan maŋemus 15-20 jagi. Geatkkit ellet váldoosiin davvin duottarguovlluin ja nuortan meahcceguovlluin.
Eanodaga, Anára ja Ohcejoga guovlluin árvvoštallet leat 40-60 geatkki, mat gullet Davviriikkaid oktasaš geatkepopulašuvdnii, mas leat badjel 800 geatkki.
Boraspiriid gaskkas lea geatki mii dagaha eanemus vahágiid boazodollui. Geatkái goddon bohccuid leat dieđihan mannan jagi loahpas juo 2893, mii lea sullii čuođi eambbo go diibmá.
Geatkki dagahan vahágat leat sullii 6,6 miljovnna evrro, mii lea eambbo go gumppe, guovžža ja albasa dahkan vahágat boazodollui oktiibuot, čállá Enontekiön Sanomat.
