Eanan- ja Birasduopmustuollu lea addán lobi Austrália fitnodahkii Talgai álggahit grafihttaruvkke olggobeallde Vazáža, Davvi Ruoŧas.
Talgas lea plána roggat 120 000 tonna granihttamálmma jahkásaččat eatnamis. Dasa lassin háliidit álggahit vel golbma eará ruvkke Nunásvárrái ja Niskái. Dálmma čearru háliida fas bissehit plánaid go dat leat sin guohtuneatnamat.
Gaskavahku, njukčamánu viđat beaivvi, attii Eanan- ja Birasduopmustuollu lobi Talga fitnodahkii. Duopmár Lena Nilsson cealká ahte ruvke lea sisabahkken birrasii ja čuohcá boazodollui.
– Dan ruvkkes galget dušše roggat guhtta mánu jagis, dalle go čearut eai leat guovllus. Duopmustuollu lea danin mearridan ahte ruvkedoaibma ja boazodoallu sáhttet gávdnot seamma báikkis, dadjá Nilsson maŋŋel duomu.
Mearrádus
Talga fitnodaga direktevra Per-Erik Lindvall cealká maŋŋel duopmu SVT Norrbottenii ahte fitnodat lea ollen dohko gosa háliidedje. Son dadjá maid fas ahte ruoná nuppástus lea dárbbašlaš máilbmái. El-biillaide dárbbašuvvo grafihtta.
– Mii leat guorahallan dán ášši máŋggaid jagiid. Dál leat ožžon dan mearrádusa maid sávaimet.
Dálmma čearru
Eatnamat gullet Dálmma čerrui ja čearu ságadoalli Aslak Allas háliida bissehit plánaid. Son lea ovdal cealkán dan.
– Háliidit čájehit ahte ruvke ja boazodoallu eai sáhte leat seamma guovllus. Šaddá beare stuora vahágin boazodollui jus ruvke ásahuvvo dohko. Olles čearu nuorttamus guovlluin eai sáhte šat guohtut, dat leat min birrajagi eatnamat, dajai čearu ságadoalli Aslak Allas NSD aviisii guovvamánus go ášši lei dikkis.
Seammás lea Girona gielddastivra cealkán ahte eai hálit ruvkke Nunásvárrái. Leanastivra galgá maid cealkit áššis.
