Go dál firte, de girdilit fas fuođđarseahkaiguin ealuid lusa. Eanandoallo- ja biebmoministtar Olaug Bollestad lohká sin addit vel logi miljovnna ruvnno biebmamii.
Odne mánnodaga ja ihttin disdaga lea Eanandoallo- ja biebmoministtar Olaug Bollestad Álttá guovllus hupmame boazodoalloeiseválddiiguin ja ealáhusain dán goavvi dálvvi ja giđa birra. Preassadeaivvadeamis odne beaivet lohpidii son addit vel logi miljovnna ruvnno biebmamii ja helikopterfievrredeapmái. Dan evttohit váldit reviderejuvvon našunalbušeahta bokte .
Dán rádjai lea boazoealáhus juo atnán 40 miljovnna biebmamii, ja helikopterat leat cuoŋománu álggu rájes juo dolvon fuođđarseahkaid ealuide viiddis guovllus Finnmárkkus. Ikte sotnabeaivvi leat bissehan girdima, muhto dál sáhttet fas joatkit.
Jáhkká leat doarvái
Ollu guovlluin ii leat veháge bievla, earenoamážit duottarguovlluin, gos sáhttá leat máŋga mehtera gasu muohta.
– Jurddašan lea miessemánu 11. beaivi juo, ja dál doallá vuos logi miljovnna bidjat dasa. Jus dat ii leat doarvái, de fertet dan dialoga váldit dasto, dadjá Bollestad.
Guhká oaidnit váikkuhusaid
Bollestad lohká goavi vuhttot ovddosguvlui maid, ii dušše dán boazodoallojagi.
– Fertejit leat miesit mat seilot vuosttažettiin, ja ovddosguvlui galget bohccot leat buori vuoimmis. Danne lea midjiide dehálaš váikkuhit vai boazodoallu šaddá ceavzilis ealáhussan boahtteáiggis ain. Dán dili gal vuhttet boazoeaiggádat maiddái boahtte jagi ja sáhttet vel guhkit oaidnit váttis jagiid dán geažil, máŋga jagi dás ovddos. Stuoraservvodat galgá veahkehit heahtejagiin, ja 50 miljovnna lea oalle ollu ruhta, dadjá ministtar.
Struktuvra hástalussan
Bollestad deattuhii ahte dán jagi maŋŋel ferte dárkilit guorahallat movt dustet dákkár roasuid boahtteáiggis, go struktuvra lea leamaš hástalussan dál.
– Sáhttet leat roasut earáládje, ja dárbbašit čielga struktuvrraid geat dat mearridit ja geat doaimmahit bargguid, gos galget boazoeaiggádat bivdit veahki, ja mii vurdo iešguđet lađđasis dan vuogádagas. Galgá leat nu ahte sii geat dárbbašit veahki eanemusat, ožžot dan ovddemus, dadjá Bollestad. Son vuordá dál oažžut árvalusaid movt eiseválddit sáhttet vel buorebut veahkehit dákkár dilis.
Muhto son ii gal sáhte lohpidit ahte bohccot eai jáme nealgái.
– In sáhte dáhkidit goassege ahte eai jáme eallit, go dan in stivre mun, ja sáhttet leat máŋga siva jápmimii. Muhto áiggun dahkat dan maid sáhtán vai guohtunroasu bohtosat leat buoret go jus eat livčče addán ruđa lassi biebmamii, dadjá Bollestad.
Ášši ođasmahtto.
