Dán čavčča čájeha Tegnerforbundet vuosttaš retrospektiiva čájáhusa sámi dáiddáriin Ánddir Ivvár Ivváriin, Iver Jåksain.
Sámediggeráđđi lea juolludan 200 000 ruvnno Tegnerforbundii, váikkuheamis sámi dáiddáriid čájáhussii «Materialfølelse og virkekraft» Iver Jåksa bokte. Čájáhus čájehuvvo Tegnerforbundet visttiin Oslos. Nu čállet sii preassadieđáhusas.
– Áigodagas golggotmánu 27. beaivvis juovlamánu 22. beaivái dán jagi čájeha Tegnerforbundet vuosttaš retrospektiiva čájáhusa sámi dáiddáriin Ánddir Ivvár Ivváriin, Iver Jåksain, Oslos. Čájáhus deattuha Jåksa tevnnegiid mat eai leat ovdal čájehuvvon almmolaččat. Golbma sámi dáiddára, Laila Labba, Niillas Helander ja Kurt Hermansen, váikkuhit čájáhussii ođđa buktagiiguin mat gulahallet Jåksa dáiddalašvuođain, čállá Sámediggi.
Iver Jåks eará perspektiivvas
Dáinna daguin háliida Tegnerforbundet čatnat Iver Jåksa dálá dálááiggedáidagii. Iver Jåks lea vuosttažettiin dovddus su grafihkain, su čuollamiiguin ja installašuvnnaiguin, muhto ávdnasiid gaskkas maid Jåks guđii ledje olu tevnnegat. Dat tevnnegat čájehit maid Jåksa barggu govdodaga.
– Čájáhus lea mielde lokteme Iver Jåksa eará perspektiivii, seammás go ovdanbuktá máŋga nuorra sámi dáiddára seamma prošeavttas, juoga man liikon hui bures doarjut, dadjá Maja Kristine Jåma (NSR).
Eará doaimmat vel
Hanne Hammer Stien ja Kristoffer Dolmen leaba čájáhusa kuráhtorat ja ovttasbargaba máŋgasiin čájáhusa gaskkustanbarggus. Earret eará galgá fágaseminára Arkiteaktamuseas, Oslo Sámiid Duodji doallat duodjeeahkediid Tegnerforbundes, ja Laila Labba ja Marte Lill Somby galgaba doallat gaskkustanprošeavtta mánáide ja nuoraide Tegnerforbundas. Dasa lassin lea gaskkustanšiehtadus dahkkon Oslo sámi skuvllain čájáhusáigodagas.
– Lea buorre ovdamearka čuovvuleapmái movt Tegnerforbundet čatná alcces eará sámi organisašuvnnaid ja ásahusaid ja ovttasbargá olahan dihte sámi dáidaga nu olusiidda go vejolaš, dadjá Jåma.
200 000 ruvdnosaš doarjja lea juolluduvvon doarjjaortnegis Kulturdoaibmabijut.
