Kárášjohtgánda, Ánde Mellet Biti Næss, lea odne bargamin Operasjon Dagsverk (OD) ovddas Ski-doo gávppis Álttás. Son ii loga diehtit nu sihkkarit masa ruđat mannet, muhto meidne ahte lea somá veahkehit olbmuid nuppe bealde máilmmi.
Kárášjohtgánda, Ánde Mellet Biti Næss, lea odne bargamin Operasjon Dagsverk (OD) ovddas Ski-doo gávppis Álttás. Son ii loga diehtit nu sihkkarit masa ruđat mannet, muhto meidne ahte lea somá veahkehit olbmuid nuppe bealde máilmmi.
Juohke jagi lágiduvvo Operasjon Dagsverk (OD) beaivi. Dan beaivvi barget nuorat fitnodagain ja addet bálkká Operasjon Dagsverk:ii. Ávvir lea finadan Ski-doo gávppis Álttás, gos Ánde Mellet Biti Næss bargá odne. Ánde Mellet lea Kárášjogas eret, ja vázzá Álttá joatkkaskuvllas, vuosttaš jagi oahppospesialiseren suorggis.
Liiko vuojániid
– Ski-doo senteris lean válljen bargat danin go mun liikon vuojániid ja skohteriid, ja orru heivemin munnje bargat dáppe, dadjá Ánde Mellet.
Go Ávvir finadii Ski-doo gávppis, de lei Ánde bidjamin hattiid gálvvuide.
– Mun galggan maŋŋel fitnat divohagas divodit skohteriid, mojohallá Ánde.
Nannet nuoraid vuoigatvuođaid
Dán jagi čogget Operasjon Dagsverk oktavuođas ruđa Argentina, Chile ja Peru nuoraide.
Ruhta galgá mannat nannet nuoraid vuoigatvuođaid áššiin mat gusket sin gorudii, seksualitehtii ja eallimii. Earret eará vai nuorat galget oažžut dárbbašlaš dearvvašvuođafálaldagaid, ja beassat ieža váldit mearrádusaid mat gusket sin gorudii. Nuorat galget maid diehtit geainna sáhttet váldit oktavuođa jus vásihit veagalváldima. Skuvllat galget maid bidjat eambbo návccaid oahpahit nuoraid seksualitehta birra.
– Somá veahkehit
Joatkkaskuvla oahppi, Ánde, ii loga diehtit nu sihkkarit masa dán jagi čogget ruđa.
– Munnje ii leat nu dehálaš dát beaivi, muhto lea somá veahkehit sin geat dárbbašit ruđa eambbo go mii. Mii galgat dinet njeallječuođi ruvnno juohkehaš dán beaivvi, ja dat ruhta manná daidda nuoraide, muitala Ánde Mellet Biti Næss vel.
