-Almmuhus-
OĐĐASAT97 000 biilaeaiggádis lea vel vahkku

97 000 biilaeaiggádis lea vel vahkku

-

-

Boahtte duorastaga álgá sáhkku coahkkit jus lea biila mii ii leat dáhkiduvvon. Logut čájehit ahte dát guoská 97 000 biilaeaiggádii.

– Dál máksá 150 ruvnno jándoris jus lea biila mii ii lea dáhkiduvvon. Dat gártá hirbmat divrrasin, measta 5000 ruvnnu mánnui. Dál berre dáhkidit biilla dahje váldit eret šilttaid, lohká Espen Opedal Tryg Forsikring dáhkádusfitnodagas.

 

– Ferte rievdat

Juovlamánus mearridii Stuoradiggi ođđa sáhkkoortnega. Ulbmil lea oažžut eret daid biillaid mat eai leat dáhkiduvvon, go dat leat riska luottaid alde.

Birrasii 100 miljovnna ruvnno šadde máksit olbmuide geat roasmmehuvve biilalihkohisvuođas, go nuppi biillas ii lean dáhkádus.

– Dán rehkega mákset sii geat leat dáhkidan biillaid. Mii vuordit ahte rievdá, ja ahte logut njidjet, lohká Opedal.

 

Sáhttá miljonvealgi

Jus áin maŋŋil njukčamánu 1. beaivvi vuoját biillain mas ii leat dáhkádus, de sáhttá lassin sáhkkui boahtit hirbmat buhtadanovddasvástádus jus vuoját man dahje gean ge njeaiga. De šattat ieš máksit buhtadusa, man gillájeaddji oažžu.

– In ipmir jus okta ge šat duostá vuodjit dáhkádusa haga. Sáhttá geavvat máksit buhtadusa miljovdna-klássas jus geavvá lihkohisvuhtii mas olmmoš roasmmehuvvá, lohká Opedal.

Jus ii áiggo sáhku, de ferte dáhkidit biilla dahje váldit eret šilttaid ovdal njukčamánu 1. beaivvi. Vuosttaš beaivvi rájes sáddejuvvo SMS-diehtu ja e-poasta sidjiide geaidda dát guoská. Jus golbma beaivvi diktá orrut, de oažžu dieđu reivve bokte.

-Almmuhus-