Sihkkarastin dihte ahte koronaiskkosat geavahuvvot riekta, de dárkilastte dál Álbmotdearvvašvuođainstituhtta geain váldo iskkus.
Doaimmat mat leat biddjon eastadandihte koronadávdda leavvamis leat suodjalandihte riskajoavkkuid ja unnidandihte noađi dearvvašvuođabálvalussii. Dál dárkilastte Álbmotdearvvašvuođainstituhtta (FHI) geaiguin galgá váldit koronaiskkosiid. Norggas váldet eanemus koronaiskkosiid álbmotlogu ektui. 95 % sis geain lea váldon teasta, ii lean koronadávda.
Bivdet orrut ruovttus jus dábálaš nuorvu
Olbmuin geain eai leat dávdamearkkat, dahje lea veahá nuorvu ja čottabávččas eai váldde koronaiskkosiid, muhto bivdet baicce orrut ruovttus beaivvi maŋŋelii go dávdamearkkat nohket. Maiddái dearvvašvuođabargit geat leat veaháš buohccit, bivdojuvvot ruovttus orrut guokte beaivvi ovdal váldo koronaiskkus.
– Dannego eat dieđe sihkkarit geaidda lea njommon koronadávda, de ávžžuhat ahte buohkat orrot ruovttus beaivvi maŋŋelii go dávdamearkkat nohket, lohká Álbmotdearvvašvuođainstituhta váldodoavttir Trude Arnesen.
Dáid vuoruhit koronateastaide
Sii geat vuoruhuvvot leat olbmot geain leat dávdamearkkat nugo gosahat, feber dahje vuoigŋanváttisvuođat – jus seammás lea dárbu doavtterveahkkái, lea dearvvašvuođabargi gii galgá leat lahka pasieanttaid, lea badjel 65 jagi ja leat eará bissovaš dávddat lassin dahje lea leamaš láhka muhttina geas lea duođaštuvvon koronadávda.
