Badjel guokte miljovnna jienasteaddji jienastedje Catalonia iešheanalaš republihkkan, muitalit eiseválddit davvi guovllus Spánias.
Badjel guokte miljovnna jienasteaddji jienastedje Catalonia iešheanalaš republihkkan, muitalit eiseválddit davvi guovllus Spánias.
Álbmotjienasteapmi čađahuvvui liikká vaikke ráđđehus Madridas geahččalii váruhit álbmoga jienasteames ja geavahii maiddái politiijai geahččalit bissehit álbmoga jienasteames.
Politiijat geavahedje sihke časkinvearjjuid, galbbaid, ja gummeluođabáhčinvearjjuid álbmoga jienasteame vuolde.
Oktiibuot 844 olbmo dárbbašedje dearvvašvuođadivššu maŋŋá politiijaid bissehanvugiid dihtii, muitalit báikkálaš dearvvašvuođaguovddážis.
Politiijat duoguštedje jienaid
Guovllu eiseválddiid ságadoalli Jordi Turull muitalii preassakonferánssas sotnabeaivvi eahket ahte olles 90 proseantta álbmogis jienastedje ahte Catalonia galgá šaddat iešráđálaš republihkkastáhtan.
Son muitala viidáseappot ahte 2,26 miljovnna jiena leat lohkkon, ja ahte badjel 2 miljovnna jienastedje dan moives jienasteames.
7,9 proseantta jienastedje vuostá, 2 proseantta eai jienastan maidige, ja 0,9 proseantta jienain eai dohkkehuvvon.
Leat 5,9 miljovnna olbmo geain lea jienastanvuoigatvuohta dán guovllus.
Catalonia eiseválddit muitalit ahte politiijat duoguštedje 770.000 jiena.
Ii dohkket politiijaid veahkaválddálašvuođa
– Dán doaivva ja gillámušbeaivvi lea Catalonia álbmot vuoitán vuoiggalaččat iešráđálaš republihkkastáhta, dajai Catalonia presideanta Carles Puigdemont TV sáddagis maŋŋil go jienastanbáikkit ledje giddejuvvon sotnabeaivvi.
Presideanta dajai maid ahte son áigu dáhttut EU guorahaddat leat go Spánia eiseválddit rihkkon olmmošvuoigatvuođaid go geavahedje politiijai álbmotjienasteame áigge.
– Sii eai sáhte šat geahččat nuppe guvlui, muitala son.
Spánia stáhtaministtar ain oaivvilda ahte álbmotjienasteapmi lei lobiheapme ja ahte Spánia ii dárbbaš šállošit. Spánia olgoriikkaministtar dadjá ahte veahkaválddálašvuohta lei unohas, muhto dasa dárbu.
– Jus olbmot eai čuovo lágaid ja dahket juoga mii lea njuolgut lobiheapmin ja mii rihkku vuođđolága, de fertejit politiijat bargat lága mielde, muitala Dastis AP ođasbyråi.
Vaikke nationála eiseválddit ledje gieldán álbmoga jienasteames, de ii leat liikká oktage organiseren jienasteame vuostá.
Ávžžuhit streiket
Ovdal jienasteame daddjui jus jua-bealli oažžu badjel 50 proseantta jienain, de Puigdemont sádde bohtosa Catalonska nationálačoahkkimii, vai sáhttet ráhkadit iešráđálaš julggaštusa.
Sierrananjoavkkut leat ávžžuhan eiseválddiid Catalonias cealkit iešráđálašvuođa.
– Ehpet galgga beahttit min dál. Duohtavuođabeaivi lea dás, logai sierrananjoavkku ANC jođiheaddji Jordi Sanchez dan máŋga duhát olbmuid geat ledje čoahkkanan Barcelona stuorámus márkanšilljui.
Loahpalaš boađus lea vurdon gárvanit moatti beaivvis, ja julggaštus sáddejuvvo maŋimustá 48 diimmu maŋŋel go boađus lea gearggus.
Òmnium Cultural sierrananjoavkku jođiheaddji, Jordi Cuixart Navarro, duođašta aviisii, La Vanguardiai, ahte sii leat ávžžuhan olbmuid streiket Catalonias golggotmánu 3. beaivvi, dieđiha Reuters.
(@NTB)
