-Almmuhus-
-Almmuhus-
OĐĐASAT 8272 háliidit Romsii universitehtii

8272 háliidit Romsii universitehtii

-

-

Eambbogat háliidit studeret UiT Norgga árktalaš universitehtas, ja ohcciidlohku lea njuiken bajás 24,8 proseanttain maŋemus njealji jagis.

8272 ohccis lea UiT Norgga árktalaš universitehta vuosttaš sávaldahkan go leat ohcan oahpposaji čakčii.

– Mii leat duhtavaččat dán jagi ohcciidloguin, lohká UiT rektor Anne Husebekk.

Vaikko UiT ja stuora universitehtat ja allaskuvllat vásihit unnibuš njiedjama ohcciidlogus diimmáža ektui, go lei buoret lohku, de lea dattetge UiT bealis dássedit bisson studeantalohku. 2015:s lei 6628 ohccis UiT vuosttaš sávaldahkan – dán jagi lea lohku lassánan 8272:i. Dat lea 24,8 proseantta lassáneapmi.

 

Ožžot barggu

Dán jagi ovdalaččas čájehii iskkadeapmi ahte 90 proseantta UiT-studeanttain, geat leat duhtavaččat ja oaivvildit ahte oahppu guoská sin bargui,  lea stabiilan bisson dan rájes go UiT álggii kandidáhtaiskosiin 2010:s. Badjelaš 80 proseantta diimmá stuđeanttain ožžo barggu maŋŋel oahpu.

– Dat čájeha ahte mis bohtet buorit kandidáhtat bargoeallimii, mii fas dagaha ahte studeanttat háliidit váldit oahpu min luhtte. Mii leat hui ilus dan ovddas, lohká Anne Husebekk.

 

Buorit logut

Dán jagi ge, nu go diibmá, lea váddáseamos beassat oahppin bacheloroahpuide áibmojohtalusfágas ja paramedisiinnas. Áibmojohtlausfágii leat 191 ohcci geat áiggoše beassat dan 12 oahpposadjái. Juohke oahpposaji nammii leat dalle 16 ohcci.

Paramedisiidnaohppui leat 282 ohcci dan 20 oahpposadjái. Dat lea sullii 14 ohcci juohke saji nammii. 

Maiddái medisiidna, fysioterapiija, bachelor spesialpedagogihka ja riektediehtaga masterohppui lea garra gilvu beassat ohppui.

 

Gealdagasat

– Mii leat duhtavaččat go suodjalandivššár-, buohccedivššár- ja oahpaheaddjeohppui ain leat buorit ohcanlogut, lohká rektor Husebekk.

Dán jagi ledje gealdagasat oaidnit movt ohcanlohku lea buohccedivššárohppui, mas vuohččan gáibiduvvo dárogiella ja matematihkka.

Miehtá Norgga čájehuvvo ahte lohku lea njiedjan, muhto Romsii leat badjel golbma ohcci juohke oahpposadjái, ja ohccit leat eanet  Áhkánjárgii, Hámmárfestii ja Hársttáide go oahposaji lohku lea.

Maiddái oahpaheaddjeoahppu vásiha seamma miehtá riikka, ahte ohcciidlohku njiedjá diimmáža ektui, muhto dan ohppui leat maid eanet ohccit go oahpposajit UiT:s. 

Mánáidgárdeohppui leat maid eanet ohccit go ovdal, mii čájehuvvo leat bivnnuhin muđuid riikkas maid.

 

Lassáneapmi Álttás, Hársttáin ja Áhkánjárggas

Ohcciidlohku lassána UiT Álttá, Hársttáid ja Áhkánjárgga campusiin. Stuorimus lassáneapmi lea mánáidsuodjalusohppui mii lea Hársttáin.

72 ohcci gilvalit 36 saji alde, mii lea 60 proseantta lassáneapmi diimmáža ektui.

– Lea maid hui illudahtti oaidnit ahte nu ollugat háliidit čađahit falástallanfága min luhtte, lohká Anne Husebekk.

Stuorámus lassáneapmi lea falástallanfágii Álttás, ja čájehuvvo ahte ohcciidlohku sihke jahkeohppui ja bachelorohppui falástallamis lea stuorimus beroštupmi.

Diibmá lei UiT:s lassáneapmi ohcciidlogus 14,34 proseanttain. Gaskamearálaš lohku olles riikkas lei dat lohku 4,73 proseantta.

Dán jagi lea UiT ohcciidlohku njiedjan 6,21 proseanttain, ja riikkadásis lea dat lohku 2,3 proseantta.

 

 

- Advertisement -
-Almmuhus-