Ikte vuddjojedje vuot bohccot Nordlánddabánas. Boazosápmelaččat lea jierásmuvvan ja oaivvildit ahte guovllus fertejit áidut.
Toga, mii lei mátkkálaččaid doalvumin Troanddimis Bådåddjui, vujii bohccuid njeaiga Lønsdal suohkanis.
Sáltoduoddara badjeolbmot leat jierásmuvvan ja oaivvildit ahte dán guvlui maid ferte áiddi cegget.
– Mii leat gávdnan birrasii 80 bohcco mat leat vuddjon togii. Guovllus lei olu varra ja bohccot ledje fasttet vuddjon. 20 bohcco fertiime goddit go ledje sakka roasmmohuvvan. Mii leat lossamielas ja masá vuollánan, čilge boazoeaiggát Lars Nikolas Kuhmunen NRK Sápmái.
Áidut
Sihke boazosápmelaš Lars Nikolas Kuhmunen ja Sáltoduoddara orohaga ovdaolmmoš Per Ole Oskal oaivvildeaba ahte guovllus fertejit áidut eastadan dihtii ahte vel eambbo bohccot vuddjojit togii.
– Bane NOR ferte farggamusat áidugoahtit vai eat dárbbaš vásihit eambbo tragediijaid, dadjá Oskal.
Máŋga čovdosa
Bane NOR dieđiha NRK Sápmái ahte sii leat áidon mannan geasi, muhto ahte áiddit leat davábealde lihkohisvuođabáikki.
Preassahoavda Thor Erik Skarpen dadjá ahte eai leat vel árvvoštallan áidut guovllu gos bohccot vuojáhalle ikte. Son dadjá ahte gávdnojit máŋga eará eastadandoaimma.
– Muhtin boazosámit leat radiomerken bohccuideaset. Jus oččošeimmet dáid dieđuid, de dieđášeimmet jus bohccot leat togamáđiid lahkosis. Álkimus čoavddus ges livččii vuojehit bohccuid dan guvlui gos gávdno áidi, dadjá son.
