Sámemusea ja Luondduguovddáš Siidda gallededje jagi 2020 áigge buohkanassii 80 000 olbmo, main 39 000 oste sisabeassanbileahta Siidda čájáhusaide.
Diimmá ektui njiejai galledeaddji lohku 34 proseanttain ja čájáhusgalledeaddji lohku fas 39 proseanttain.
– Sáhttá lohkat ahte jahki 2020 lei riikkasis turismma jahki Siiddas, lohká Siida Musea áššehasbálvalanvástideaddji, Minna Väisänen, preassadieđáhusas.
Son muitala jahki 2020 álggii bures. Ođđajagimánus čájáhusguossit ledje eanet go goassige ovdal, muhto juo guovvamánu loahpas, de váikkuhišgođii covid-19-pandemiija turismii. Njukčamánu 17. beaivve giddii Siida uvssaid bealgoalmmát mánnui, nu go eará museat ja luondduguovddážat Suomas. Geassi manai bures, giitu suopmelaš turisttaide. Nu go ovdditge jagiid, de eanemus čájáhusgalledeaddjit ledje suoidnemánus (badjel 8 000). Geasi huša maŋŋá lei ráfálaš čakča ja álgodálvi.
Sisriikkalaččat bohte
Minna Väisänen lohká Sámemusea ja Luondduguovddáš Siida lea leamaš juo máŋga baji hui riikkaidgaskasaš galledanbáiki. Jahki 2020 lei čielgasit riikkasis turisttaid jahki, go čájáhusgallededdjiin 66 proseantta ledje suopmelaččat. Ovddit jagiid leamaš 60 proseantta čájáhusgallededdjiin olgoriikkalaš turisttat. Lohká su mielas leamaš miellagiddevaš vásihit ahte olbmuin geain lea Museakoarta, leat mealgat lassánan. Jagi 2019:s fitne 2.700 olbmo geain lea Museakoarta ja 2020:s fas 4.400.
Su mielas lea buorre go galledanlohku, 990 olbmo, Sámemusea Siidda guovlludoaibmabáikkis Nuortalaččaid árbevierrodálu Čeavetjávrris lea bisson seamma dásis go ovdal.
Sihkkarvuohta
Minna Väisänen muitala buohkanassii Siiddas bálvaledje áššehasaid jagi 2020 áigge koronaepidemiijas fuolakeahttá bures ja dorvvolaččat. Vuođđočájáhusaid lassin ledje sis logi molsašuvvi čájáhusat. Olusat oahpásmuvve maid olgomuseas sámi huksenárbevirrui ja ealáhusaide. Olbmot fitne maid Siida Shop gávppis, restoráŋŋa Sarrihis, Anára gieldda turismarávvemis ja Meahciráđđehusa áššehasbálvalanbáikkis go Siida lei rabas.
Stuoridanbargu álggahuvvo
Minna Väisänen lohká Siida-dálu viiddidanbarggut álge áigetávvala mielde miessemánus 2020. Huksenbarggut eai leat váikkuhan Siidda galledeapmái. Dušše biilaguođđinsajit orro leamen suoidnemánus menddo unnán, go huksenbargguid várás oasi biilaguođđinbáikkiin galggai áidut.
Son muitala badjelaš jagi geahčen lea čoakkáldatovttadat ja restoráŋŋaoassi gárvvis. Dat leat juo robi vuolde ja huksenbarggut leat ovdánan mealgat. Ođđa lanjat ja sajit gárvánit 2021 giđa. Siida-dálu divodanbargu álgá 2021 geasi ja ođđa váldočájáhusa huksen, mat galget gárvánit 2022 giđđii. Divodanbargguid áigge lea Siidda olgomusea rabas.
