Distaga dárkkistii Stáda geaidnodoaimmahat johtolaga Mátta-Várjjagis.
Stáda geaidnodoaimmahat dárkkista luottaid johtolatsihkarvuođa dihte buot johtaleddjiide. Distaga dárkkistedje johtolaga Mátta-Várjjagis, mas oktiibuot dárkkistedje 59 lossabiilla ja 20 geahppabiilla. Boađusin ledje guhtta vuodjingildosa, okta sáhkkohalai deahkaid dihte, okta sáhkkohalai badjelmeare deattu dihte ja gávcci vuoddji ožžo čálalaš dieđu ahte leat váilevašvuođat.
– Muitet molsut geassejuvllaide maiddái gálvojorriin. Bisseheimmet ovtta biilla mas lei gálvojorri mas vuoddji lei vajálduhttán molsut geassejuvllaide. Son sáhkkohalai 1000 ruvdnosaš sáhkuin, čállá Stáda geaidnodoaimmahat preassadieđáhusas.
– Mielde buoridit johtolatdorvvolašvuođa
Guhtta vuoddji ožžo vuodjingildosa – okta váilevaš liigespeadjala dihte go geasehii viessovovnna, okta váilevaš ámmátvuoddjigelbbolašvuođa dihte, okta guorbmebiila lei badjelmeare govdat ja golmmas gálvodeattu ja gálvolástema dihte.
– Guokte juvlagoivvona bissehuvvojedje, main ledje pállagáffalat. Nuppis ledje suodjalanávdnasat pállagáffaliin, mat galget geahpedit vahága jus beaškkiha oktii eará biillain. Dát vuoddji lea mielde buoridit johtolatdorvvolašvuođa. Dasa mii liikot, čállet Stáda geaidnodoaimmahat preassadieđáhusas.
Deaddodárkkisteapmi
Girkonjárgga johtolatstašuvnnas leat dán áigodaga čađahan deaddodárkkisteami, ja eatnasat leat riekta lásten. Guovttis šattaiga ođđasit gárrat gálvvu, ja okta sáhkkohalai 16850 ruvdnosaš sáhkuin badjelmeare deattu dihte, 5300 kg.
