-Almmuhus-
-Almmuhus-
OĐĐASAT 70-jáhkkasaš nisu bahuid roasmmohuvvon

70-jáhkkasaš nisu bahuid roasmmohuvvon

-

-

Mánnodaga beaškkeheigga guokte biilla oktii Leavnnjas, Porsáŋggu suohkanis. 70-jáhkkasaš nisu dilálašvuohta lea stáđismeahttun.

Biilalihkohisvuohta dahpahuvai Esso-stašuvnna buohta mánnodaga maŋŋelgaskabeaivvi. Okta 70-jáhkkasaš nisu lei mielčuovvu dan biillas man njeaiga beaškkehii biila, nisu dilálašvuohta lea dál hedjonan.

 

Ii leat čuvvon johtolatnjuolggadusaid

Lihkohisvuohta dahpahuvai go dat biila mas 70-jahkkasaš nisu lei mielčuovvu galggai mohkastit olggos E6 johtolagas Esso-stašuvdnii. De beaškkehii eará biila mii bođii nuorta bealde biilii.

— Dat orro nu ahte dat biila mii lea mohkastan eret luottas ii leat čuvvon vuordingeatnegasvuohta njuolggadusa, lohká operašuvnnajođiheaddji Geir Roar Nesbø Oarje-Finnmárkku politiijaguovllus NRK:ii.

 

Hedjonan

Mánnodat eahkeda dieđihii gulahallanhoavda Finnmárkkubuohcciviesus, Ivar Greiner ahte 20-jahkkasaš dievdu, gii vujii dainna nuppi biillain lea geahppasit roasmmohuvvon, muhto áigot su bearráigeahččat Hammerfeastta buohcciviesus. Dievddu dilálašvuohta lea disdat iđida ain seamma.

— Dat boarráset nisu lea baháid roasmmohuvvon, muhto juste dál lea son stabiila, dieđihii Greiner mánnodaga. Dál čájehuvvo ahte nissona dilálašvuohta lea vearáskan.

— 70-jáhkkasaš nisu lea baháid roasmmohuvvon ja su dilálašvuohta lea dál stáđismeahttun, muitala Greiner disdat iđida.

 

Čuohpahan olggos biillas

Politiijat dieđihit ahte dat 70-jahkkasaš nisu lea čuohpahuvvon olggos biillas.

— Mii válljiimet čuohpahit nissona olggos biillas. Dat ii mearkkaš ahte nisu lei darvánan billii, muhto sáhttá leat buoret vuohki gádjut olbmo gii lea roasmmohuvvon, čilge operašuvnnajođiheaddji Geir Nesbø.

Politiijat dieđihit ahte sii eai balat ahte lei badjelmeare leahttu go lihkohisvuohta dahpahuvai, ja ahte sis eai leat dieđut mat muitalit ahte biilavuoddjit leigga gárremin.

- Advertisement -
-Almmuhus-