Measta beali unnit olbmo dušše johtolagas diimmá cuoŋománo ektui.
Trygg Trafikk- johtolatsearvi dieđiha preassadieđáhus ahte diibmá ledje 13 olbmo geat dušše johtolagas, ja lohku lea beali unnit dán jagi. Seniorráđđeaddi Bård Morten Johansen ii leat aŋkke duhtavaš.
– Ollislaččat dán jagi logut leat heajut, dadjá Johansen. Dán jagi leat juo 31 olbmo duššan johtolagas.
Koronadoaibmabijut mearkkaša unnit biilavuoddjin olles cuoŋománus ja beassážiid. Muhto eai aŋkke áiggo konkluderet ahte lea korona dihte.
– Mii eat sáhte dadjá ahte unnánat johtalus lea váikkuhan lihkohisvuođaloguide. Mii oaidnit ahte dat leat seamma dásis go maŋemus vihta jagi, muhto lea baicce diimmá cuoŋománnu mii lei earenoamáš surgadis mánnu, muitala Johansen.
Unnánat biillat dagahii eanet leavttu
Dat ledje golbma biilavuoddji, okta mohtorsihkkelvuoddji, guokte vázzi ja okta sihkkelis geat dušše.
– Dat lea eanet olbmot geat sihkkelastet, vihket dahje vázzet tuvrra. Ja unnánat biillat luottain sáhttá dagahit ahte eanet biilavuoddjit vudjet beare garrasit. De sáhttet várálaš dilálašvuođat čuožžilit vázziide ja sidjiide geat sihkkelastet. Ávžžuhit danne buohkaid doalahit leahttorájiid, ja leat earenoamáš gozuid alde go vudjet ja maiddái go vázzet, dadjá Johansen.
