Dán rádjai dán jagi leat 696 fitnodaga reastaluvvan.
Diimmá ektui lea lohku lassánan 10,3 proseanttain. Dan čájehit varas logut maid Experian analysafitnodat lea almmuhan. Dušše guovvamánus reastaluvve dahje heaittihuvvo 411 oasusfitnodaga Norggas.
Go buohtastahttá diimmá loguin, mii lei 345 fitnodaga, lea dát 19 proseantta lassáneapmi.
Ain eanemus huksensuorggis
Huksensuorggis leat reastaluvvamat lassánan eanemus dán rádjai, dán jagi. Guovvamánus reastaluvve 105 fitnodaga huksensuorggis ja dat lea 18,1 proseantta lassáneapmi.
Per Ivar Kristiansen gii lea Experian vuovdindirektevra dadjá dán suorggi garasin.
– Huksensuorgi lea suorgi mas lea garra gilvu, haddedeaddu ja vuollegis margiinnat ja maid mii guhkit áiggi leat oaidnán rahčamen, dadjá son preassadieđáhusas.
Unnimus davvin
Oslo ja Viken fylkkain leat eanemus reastaluvvan fitnodagat, 90 Oslos ja 87 Vikenis.
Davvi-Norggas, Nordlánddas leat buot unnimus fitnodagat reastaluvvan. Nordlánddas ledje 12 fitnodaga mat reastaluvve ja Romssas ja Finnmárkkus ges 15.
