Biilavuoddjit geat eai čuovo mielde vuojedettiin lassánit. 350.000 biilavuoddji čuggot mátketelefuvnna vuojedettiin ja badjel miljovdnabeali biilavuoddji hállet telefuvnnas bealljebilttuid haga.
Biilavuoddjit geat eai čuovo mielde vuojedettiin lassánit. 350.000 biilavuoddji čuggot mátketelefuvnna vuojedettiin ja badjel miljovdnabeali biilavuoddji hállet telefuvnnas bealljebilttuid haga.
Iskkadeapmi man YouGov lea čađahan Trygg Trafikk ja Gjensidige ovddas čájeha ahte stuora oassi Norgga biilavuddjiin konsentrerejit menddo unnán johtolagas, logut čájehit ahte birrasii 1,1 miljovnna biilavuoddji doaimmahit áibbas eará áššiid vuojedettiin.
– Menddo olusiin lea fuomášupmi boastto sajis vuojedettiin, lea heaggaváralaš geavahit mátketelefuvnna vuojedettiin, lohká Trygg Trafikk direktevra Jan Johansen NRK:i.
600.000 vuoddji hállet telefuvnnas
Sullii 600.000 norgalaš biilavuoddji vástidit guorahallamis ahte riŋgejit ja vástidit mátketelefuvnna vuojedettiin vaikke sis eai leat bealljebilttut dahje eará rusttegat, 350.000 biilavuoddji ges čálašit dahje lohket dieđuid mátketelefuvnnas go mátkkoštit johtolagas. Dát čájeha ahte stuora oassi biilavuddjiin rihkkot Norgga lága, oslolaččat leat vearrámusat go 22 proseantta biilavuddjiin mieđihit hállat telefuvnnas bealljebilttuid haga ja 15 proseantta ges čuggot mátketelefuvnna vuojedettiin.
29:s jápmán teakstadieđuid geažil
Stáhta geaidnodoaimmahaga logut čájehit ahte 29 norgalačča dušše johtolagas 2005-2013 áigodagas sivas go geavahedje mátketelefuvnna.
– Iskkadeamit čájehit ahte biilavuoddji fuomášupmi johtolagas jávká 23 sekundii ovtta teakstadieđu geažil. Dát duppalastá vejolaš biilalihkohisvuođaid. Jus vuoját 70 kilomehtera diimmus, de johtá biila 20 mehtera sekunddas, rehketbihttá muitala de ahte vuoját viehka guhkás dan áiggis go logat teakstadieđu it ge čuovo mielde johtolagas, lohká Johansen.
Biilavuoddjit geat válddahallat geavaheamis mátketelefuvnna johtolagas lobiheamit sáhkohallet 1300 ruvnnuin.
Váralaš borrat vuojedettiin
Oallugat liikojit maiddái boradit vuojedettiin. Iskkadeamis vástidit 45 proseantta biilavuddjiin ahte boradit vuojedettiin. Trygg Trafikk váruha maiddái dán dábi váralažžan ja čilge ahte gánniha bisánastit vai beassá vuoiŋŋastit, njulget julggiid, boradit ja čuoggut mátketelefuvnnas.
– Go biillain vuodjit, de galgá 100 proseanta min fuomášumit johtolagas. Boahtte vahkkus čađahišgoahtit áŋggirdeami vai biilavuoddjit fuomášit filmma bokte man váralaš sáhttá jus ii čuovo mielde johtolagas, loahpaha Trygg Trafikk direktevra Jan Johansen.
