Dan dieđihii Romssa Universitehtabuohcciviessu (UNN) mánnodaga eahkes.
Mánnodaga eahkeda dieđihii UNN ahte dievdu guhte vuojehalai Lákkovuonbađas sotnabeaivve iđida lea duššan.
– Dievdu guhte vuojehalai Lákkovuonbađas, ja sáddejuvvui Romssa universitehtabuohccivissui bahuid roasmmehuvvan, duššai dađi bahábut odne maŋŋelgaskabeaivvi. Oapmahaččat leat ožžon dieđu, dieđihii UNN Twittera bokte mánnodateahkeda.
Lei álggos gozuid alde
Lihkuhisvuohta dáhpáhuvai sotnabeaivvi go biilavuoddji áiggui sihkkelasti meaddel vuodjit.
– Sihkkelasti lei álggos gozuid alde, muhto de jámálgišgođii ja son dolvojuvvui Romssa Universitehtabuohccivissui ambulánsagirdiin, dajai operašuvdnajođiheaddji Leo Johansen Ávvirii sotnabeaivvi.
Romssa Universitehtabuohcceviesu preassavákta dieđihii mánnodaga iđida ahte dievdu lei bahuid roasmmehuvvan ja divššus.
