Olgeš, Ovddádusbellodat, Kristtalaš álbmotbellodat ja Gurutbellodat leat suođđan Trønder-Avisai ahte sii juolludit guhtta miljovnna kruvnna Saemien Sijte ođđa museaviesu álggaheapmái. Saemien Sijte direktevra Birgitta Fossum ii duostta vuos illudit.
Olgeš, Ovddádusbellodat, Kristtalaš álbmotbellodat ja Gurutbellodat leat suođđan Trønder-Avisai ahte sii juolludit guhtta miljovnna kruvnna Saemien Sijte ođđa museaviesu álggaheapmái. Saemien Sijte direktevra Birgitta Fossum ii duostta vuos illudit.
Stáhtabušeahtta 2017 várás almmuhuvvo ihttin, muhto Olgešbellodat, Ovddádusbellodat, Kristtalaš álbmotbellodat ja Gurutbellodat lea suođđan jearahallamis ahte juolludit guhtta miljovnna kruvnnu Saemien Sijtii Snoasas dán stáhtabušeahtas, čállá Trønder-Avisa gaskavahku, golggotmánu viđát beaivvi, báberaviissas.
– Guhtta miljovnna kruvnna berrešii leat doarvái oažžut museaviessohuksenprošeavtta johtui. Muhto boahtte jagi bušeahtas berrejit čuovvut mielde ruđat vai sáhttet huksegoahtit, lohká Saemien Sijte direktevra Birgitta Fossum.
Lohká ii duostta vuos rahpat šampánjabohttala ovdalgo sáhttet goaivugoahtit saji museageađgejuolgái.
Buorre mearka
Saemien Sijte direktevra Birgitta Fossum lohká son ii duostta ávvudišgoahtit ovdal go ruđat leat boahtán.
– Mii fertet vuordit dan huksenruđa juolludeami ovdal go sáhttit illudišgoahtit. Muhto válddán dán dieđu buorre mearkan, lohká Fossum.
Muitala ahte sii dihtet Bargiidbellodat, Guovddášbellodat ja Sosialisttalaš gurutbellodat leat mielas hukset ođđa museaviesu Saemien Sijtii.
– Mun in ádde mii sáhtášii dan áigumuša bissehit, muhto válddán vuhtii buorre mearkan, lohká Saemien Sijte direktevra Birgitta Fossum.
Uhcidedje viessoplána
Álgoprošeakta ii leat vuos gárvvis. Direktevra Fossum lohká álgoprošeakta ferte leat gárvvis ja sis váilot arkiteavtta tevnnegat vissui. Álgoplánaid mielde galgá leat láigoheaddjit viesus, muhto dan jurdaga lea guođđán nu ahte Saemien Sijte dárbbaša ođđa viessotevnnegiid.
– Ovddit prošeakta lei máksit 240 miljovnna kruvnna, muhto de mearridedje viessu galgá leat uhcit ja dušše Saemien Sijtii, ja máksit dušše 140 miljovnna kruvnna. Dalle eat sáhte geavahit daid ovddeš viessotevnnegiid, čilge Fossum.
Muitala dán han sii leat dáhtton oažžut vai sáhttigohtet gárvet prošeavtta huksenláhkai.
– Jus dál eai livčče juolludan ruđaid, de livčče sáhtán gáddit doppe ii gávdno dáhttu duohtandahkat dán museaviesu. Dál gal orru vuhttomin dáhttu, ja dat lea mu mielas, buorre mearka, lohká Saemien Sijte direktevra Birgitta Fossum.
Vuordámušaid ektui
Sámediggeráđđelahttu Henrik Olsen mokta loktana go gullá ahte 2016 Stáhtabušeahtas juolludit guhtta miljovnna kruvnna Saemien Sijte ođđa museaviesu álgoprošektii.
– Lea hirbmat buorre ođas. Saemien Sijte lea dan bargui ožžon golbma miljovnna ovdal. Dát guhtta miljovnna sihkkarastá ahte álgoprošeavtta sáhttá gárvet huksenláhkai. Mii áddet dan nu ahte dat sihkkarastá ahte huksenbargu sáhttá álggahuvvot. Dás lea dehálaš ahte juolludeami mielde čuovvu teaksta mii muitala ahte huksen galgá álggahuvvot, lohká ráđđelahttu Henrik Olsen ja lohká dát lea sin vuordámušaid ektui.
Son muitala ahte Saemien Sijtii lea geavahuvvon 20 miljovnna kruvnna vuosttaš prošektii mii ii goassege duohtan dahkkojuvvon:
– Danne lea áddehahtti ahte direktevra Fossum ii duostta vuos ávvudit daid ruđaid, loahpaha Olsen.
