Čakčii ožžot 5800 oahpaheaddji Norggas fálaldaga lassioahpu gazzat.
Ovdal 2025 leat máŋga oahpaheaddji geat ain fertejit lassioahpu gazzat. Mánáidskuvllas galget sii geat oahpahit sámegiela, matematihka, eaŋgalasgiela, dárogiela ja dárogielat giehtagiela váldán dassážii lassi 30 oahppočuoggá. Nuoraidskuvlla oahpaheaddjit fertejit 60 lassi oahppočuoggá váldit dain seamma fágain.
Dat lea oassin Máhttodepartemeantta nationála strategiijaplánas mii álggahuvvui 2015:s, mas ulbmil lea nannet oahpahusaid kvalitehta.
– Lea dehálaš mánáid oahpahussii ahte oahpaheddjiin lea ođasmahttojuvvon oahppu dain fágain maid sii oahpahit mánáide. Mis leat ollu buorit oahpaheaddjit dál, muhto lea álot buoridanmunni. Danne lean ilus go nu máŋga oahpaheaddji leat ohcan ja háliidan lassioahpu gazzat, dadjá máhtto- ja integrerenministtar Guri Melby Máhttodepartemeantta preassadieđáhusas.
