-Almmuhus-
-Almmuhus-
OĐĐASAT58 olgoriika muorje­čoaggis duođaš­tuvvon korona

58 olgoriika muorje­čoaggis duođaš­tuvvon korona

-

-

Davvi-Ruŧŧii leat boahtán olgoriika muorječoaggit, ja dál lea sin bargobáikkis hirbmosit leavvan koronadávda. 

Golmma orrunsajis Norrskensbär fitnodagas Älvsbyas, lea duođaštuvvon koronadávda. Oktiibuot lea 58 bargis duođaštuvvon korona, dain 76 olbmos geat leat boahtán Thailánddas čoaggin dihte murjjiid fitnodahkii. 

Regiovdna Norrbotten buohcceviesus dadjet ahte eai dieđe vel lea go dealtavariántta mii lea njommon bargiide.

– Bargit eai leat buohcan garrasit, sis leat gehpes dávdamearkkat, dadjá Jonas Hansson, sadjásaš njoammuneastadandoavttir Davvi-Ruoŧas preassadieđáhusas. 

Hoavda Norrskensbär fitnodagas, Catarina Lundberg, dadjá SVT Norrbottenii ahte sii leat iskan buot bargiid ovdal go bohte Ruŧŧii čoaggit murjjiid Norrbottenis. 

– Mii doaivut ahte leat buktán dávdda Thailánddas, go barge moadde beaivvi ja de fáhkka buohccájedje. Eat lean vuordán ná stuora njoammunloguid. Dál leat buot bargit erremis ja mii vuordit dassái sii dearvvašmuvvet ja sáhttet fas bargagoahtit, čilge Catarina Lundberg. 

-Almmuhus-