Politiijat Romssas dieđihit ahte guollebivdi lea láhppon Dieváidetnui, Málatvuomis, Sis-Romssas duorastaga. Ja vaikko stuora gádjunveahka lea ohcan de almmái ii leat vel gávdnon.
Diehtu bođii duorastaga dii. 13.40 ja stuora ohcanveahka sáddejuvvui báikái. Sihke politiijat, militeara, Rukses Ruossa ja Norgga Álbmotveahkki álge ohcat guollebivdi.
Politiijat dieđihit ahte leat ohcan olles eahkeda ja ija muhto eai leat vel gávdnan guollebivdi. Eatnu lea dulvvis ja virdái čilgejit politiijat.
– Mii leat ohcan girdiin, helikopteriin, dronain, fatnasiin ja maid buokčanbálvalusain ja beatnagiiguin. Mis lea sihke Rukses Ruossa ja Norgga Álbmotveahkki leamaš veahkkin.
– Diibmu guovttis mannan ija mii heittiimet gaskaboddosaččat ohcanakšuvnna, go leimmet ohcan guoktenuppelot diimmu eat ge gávdnan albmá čilge Eirik Kileng, Romssa politiijaguovllus.
Guollebivdi galgá guđa áiggi iđđedis vuolgán oaggut, muhto go son ii boahtán ruovttoluotta bearraša lusa nu go lei plánejuvvon, de álge olbmot ohcat su. Politiijat dieđihit ahte sii leat gávdnan su diŋggaid ja oaggunstávrrá eatnogáttis.
55-jahkášas guollebivdi lea eret Rogalánddas.
(©NTB)
