Dávda lea leavvan Hámmerfeasttas Áltái, Kárášjohkii, Girkonjárgii ja Detnui.
Bearjadat eahkeda dieđihii Hámmerfeastta sátnejođiheaddji, Marianne Sivertsen Næss, ahte Hámmerfeasttas lea 36 olbmos duođaštuvvon Covid-19. Buohkat vuollel 30 jagi.
Dássážii duođaštuvvo korona 46 olbmos Hámmerfeasttas, njealji olbmos Álttás, guoktásis Kárášjogas ja ovtta olbmos Girkonjárggas, čállá Altaposten.
– Mii ballat ahte dávda sáhttá leat njommon eambbosiidda, lohka Næss.
Maiddái Deanus leat guokte olbmo erremis go sudnos lea čanastupmi koronaleavvamii Hámmerfeasttas. Goappašagat leaba koronaiskosa váldán, ja leaba vuordime vástádusa iskosis.
Pasieanttat šaddet Girkonjárgii
Hámmerfeasta buohcciviessu lea fiskes gearggusvuođadásis. Njoammundilálašvuohta dagaha ahte Hámmerfeasta buohccivissui eai vuostáiváldde seamma ollu pasieanttaid go dábálaččat fáhkkatlaš kirurgiijai ja ortopediijai.
Pasieanttat mat muđui livččii galgan Hámmerfeasta buohccivissui sáhttet dárbbu mielde sáddejuvvot Girkonjárgga buohccivissui. Maiddái Girkonjárgga buohcciviessu lea bearjadaga rájes fiskes gearggusvuođadásis, dieđiha Finnmárkku buohcciviessu preassadieđáhusas.
