Guovdageainnu suohkana ovdagoddi lea mannan disdaga árvalan bidjat 5,1 miljovnna ruvnnu seastinfondii, sihkkarvuohtan boahtteáigái.
Mannan disdaga suohkana ovdagotti bušeahtamudden áššis mearridedje 5.144000 miljovnna sirdit fondii, seastima dihte, vurket buorrin maŋit áigái.
– Dan guđa miljovnna ruvnnos maid mii várriimet bušeahtas suohkanstivrras juovllaid áiggi, máksit oasi stuorra vealggis mii lei čoggon daid maŋimuš jagiid, lea báhcán dego buorrin bušeahtas, čilge Guovdageainnu suohkana sátnejođiheaddji Johan Vasara.
Nu lea sis ráđđi sirdit badjelaš vihtta miljovnna seastinfondii.
– Jierpmálaš nuppi kontui bidjat
Vasara buohtastahttá ovdagotti mearrádusa, sirdit 5,1 miljovnna seastinfondii, iežas priváhta ruhtaburssa stivrejumiin.
– Dat lea seammá go juohke olbmo iežas ruhtadilis, ahte lea jierpmálaš nuppi kontui bidjat veahá ruđa vai maŋit áigái lea sihkkarvuohta. Nu lea maiddái suohkanbušeahtas. Mii sáhttit máksit goluid mat sáhtte boahtit vuorddekeahttá. Seammás ge čoggošii veahá ruhta suohkanii, ja garvit Robeka boahtte áiggis fas, čilge son.
Robek
Jus suohkan gártá dan nu gohčoduvvon Robek-listui man Norgga stáhta almmuha, de dat mearkkaša ahte dán suohkanis lea stuorra vuolláibáza.
Guovdageainnu suohkanis ledje vealggit 14 miljovnna ruvnno. Vuohkin beassat eret listtus lea čuovvut stáhta geatnegahtton gáibádusaid ja čađahit garra seastindoaimmaid. Guovdageainnu suohkana bákkolaš seastinpolitihka maŋŋil čájeha jagi 2015 rehketdoallu suohkanis, ahte lea ráđđi bidjat seastinfondii 5,1 miljovnna.
Eastadit “virgečuohppamiid”
Vasara oaivvilda ahte suohkana bargun lea eastadit diliid mas sáhttet gártat čuohppat virggiid bušeahta njulgema dihte. Danin oaivvilda suohkana ovdagotti evttohus buorre veahkkereaidun sirdit 5,1 miljovnna ruvnno seastinfondii.
– Mun in geahča das nu ollu Robeka-áigái, muhto guđe láhkai sáhttit sihkkarastit ruhtadili. Nu ahte mis lea vuorkkás veahá ruhta, vai eat boađe dakkár dillái go heađis šaddat ovtta ládje olbmuid caggat eret dan dihte vai rehketdoallu dohkkehuvvo. Dainna evttohusain dál lea evttohuvvon vuorkái biddjot ruhta, vai eastadit dakkár diliid, čilge son.
Jáhkká beassat eret Robekas ovdal merrojuvvon áiggi
Ovdagotti evttohusa sirdit ruđaid seastinfondii galgá de suohkanstivra meannudit 16. beaivvi geassemánu čoahkkimis mii dollojuvvo Mázes. Vasara ii loga sáhttit dadjat de goas suohkan oalát beassá eret Robek-listtus.
– Dan in duostta dadjat, dan dáhtona, go ii láve jierpmálaš dan dadjat. Muhto jus manná bures de galggašeimmet leat olgun Robekas ollu ovdal dan áiggi mii lei rehkenastojuvvon.
