-Almmuhus-
OĐĐASAT51 500 ruvnno njuolga stáhta lummii

51 500 ruvnno njuolga stáhta lummii

-

-

76 guorbmebiilla ja 36 biilla dárkkistuvvojedje Geađgeluobbalis ja Guovdageainnus. Dat buvttii badjel 50 000 ruvnna stáhta ruhtabursii.

Stáhta geaidnodoaimmahat lea dárkkistan johtolaga Geađgeluobbalis, Norgga ja Suoma rájis, Guovdageainnu lulábealde, ja maid Guovdageainnus.

Geađgeluobbalis ledje 76 guorbmebiilla maid dárkkistedje, Guovdageainnus fas 36 biilla.

29 vuoddji šaddet gierdat juogalágan reakšuvnna Stáhta geaidnodoaimmahagas.

11 vuoddji eai beassan šat vuoddját viidáseappot go leat rihkkon nu roavvát njuolggadusaid mat gáibiduvvojit go galgá biillain beassat vuodjit.

10 guorbmebiilavuoddji eai beassan vuoddját šat, go ledje earret eará vuodján geassedeahkaiguin, eai lean virjjit deahkaide nu go gáibiduvvo guorbmebiillain, okta rihkkui vuodjin- ja vuoiŋŋastannjuolggadusaid.

Earret eará sáhkkohalle njealje Norgga guorbmebiilavuoddji go eai lean virjjit guorbmebiillas dahje go ledje geassedeahkat guorbmebiillas.

Guovdageainnus sáhkkohalle guokte biilavuoddji go eaba atnán biilaboahkána, ja ovtta biillas čuhppe šilttaid eret. Ággan dasa lei go ii leat leamašan nu gohčoduvvon EU-dárkkisteamis.

-Almmuhus-