Dán jagi leat boahtán birrasiid 5000 dorvoohcci Norgii Storskog rádjestašuvnna bokte Nuorta Finnmárkkus.
Ikte bohte 122 ođđa dorvoohcci Norgii Ruoššas Storskog bokte. Nuortta Finnmárkkupolitiijaguovllu preassafákta Anders Stang Lund muitala dán rádjai dán jagi leat boahtán birrasiid 5000 dorvoohcci Norgii Storskog bokte.
Beaivválaččat boahtán
Čakčamánu rájes leat measta juohke beaivvi boahtán dorvoohccit, ja álggos ledje eanaš Syrilaččat.
– Dađi mielde leat boahtán sihke Afganistanas, Pakistan, Bangladeshas ja maid eará riikkain, lohká son. Buot dorvoohccit iskojuvvot pássa ja visuma ektui, ja gažaduvvot manne leat boahtán Norgii.
– Muhttinat ohcet dorvvu go leat báhtareaddjit. Sii sáddejuvvot vuostáiváldimiidda miehta Norgga, ovdal go Politiijaid olgoriikkalaččaiddirektoráhtta gieđahalla sin dorvoohcamiid. lohká Lund.
Válljejit jorggihit
Son čilge muhttimat fas leat vuolgán gávdnat barggu, váldit oahpu ja buoret eallima, mii dieđisge ii dárbbu dihte mearkkaš sii ožžot asyla Norggas.
– Olusat sáddejuvvot ruovtturiikii fas, ja muhttimat válljejit ges fas jorggihit fas Ruššii, gos sis lea lobalaš orrun.
Lund lohká lea váttis diehtit man guhká bohtet dorvoohccit Norgii Storskog bokte, muhto ii oro dilli Eurohpás báhtareddjiid ektui rievdame nu ahte vuordimis bohtet ain dorvoohccit ovtta áiggi ovddasguvlui, lohká son.
