Norgga 5. luohkkálaččat leat čeahpimusat rehkenastit buot Davviriikkain, Eurohpás ges leat buoremusaid searvvis sihke matematihkas ja luonddufágas.
Dál leat 2019 TIMSS (Trends in International Mathematics and Science Study) bohtosat ilbman ja čájehuvvo ahte Norgga 5. luohkát leat čeahpimusaid searvvis matematihkas. Eurohpás leat dušše Ruoššas, Davvi-Irlánddas ja Eŋglánddas buorebut rehkenastit.
– Lea mávssolaš oaidnit ahte Norgga 5. luohkkálaččat ain leat čeahpimusaid searvvis sihke matematihkas ja luonddufágas. Dat duođašta ahte mánáidskuvlla reálafágaoahpahus doallá buori dási, dadjá oahpahus- ja integrerenministtar Guri Melby preassadieđáhusas.
Guorahallan čađahuvvo juohke njealját jagi ja geahčada man bures oahppit birgejit matematihkas ja luonddufágas. Ulbmil lea ahte riikkat nannejit oahpahusa bohtosiid vuođul. 2019:s serve 64 Eurohpá riikka dasa.
Bohtosat njidjet
Norgga nuoraidskuvllain birgehallet gaskamearálaččat sihke matematihkas ja luonddufágas, ja mannan iskkadeami ektui njidjet bohtosat veaháš.
Ráđđehus lea bidjan searaid buoridan dihte reálafágaoahpahusa nuoraidskuvllain.
– Nuoraidskuvllas sáhttit nannet oahpahusa ja mannan čavčča doaibmagohte ge ođđa oahppoplánat mat ovddidit sihke matematihka ja luonddufága eanet praktihkalaš fágan, ulbmilin lea maid ahte oahppit besset čiekŋalit oahppat dan guovtti fága fáttáid, lohká Melby.
Loktet buorebut
Guorahallan čájeha maid ahte Norgga oahppit loktet buorebut skuvllas go eará riikkain. Givssideapmi lea maid njiedjan 2015 rájes.
– Lea hirbmat dehálaš ahte oahppit loktet. Dalle ohppet maiddái eanet. Dát čájeha ahte skuvllain ovddidit oahppobirrasa, dadjá oahpahus- ja integrerenministtar Guri Melby.
