Team Sámi spábbačiekčannieiddain ledje guokte spábbačiekčama gaskavahkku, veaigin Yukon vuostá tiibmu 13:48 ja eahkedis tiimmu 20:48 Ruonáeatnama vuostá.
Team Sámi spábbačiekčannieiddain ledje guokte spábbačiekčama gaskavahkku, veaigin Yukon vuostá tiibmu 13:48 ja eahkedis tiimmu 20:48 Ruonáeatnama vuostá.
– Vuittiimet Yukon vuostá 5-4. Sofie Sörensen čievččastii spáppa golbmii mollii, Kristin Hamnvik deaivvai oktii ja Jenny Marie Slettli deaivvai maid moala oktii, lohká FA Sápmi hárjeheaddji Ulrika Renstrøm.
Vurrolagaid moala
– Lei hui gelddolaš spábbačiekčan. Vuos fidnii Yukon ovtta moala, dasto fidnii Sápmi ovtta ja lei 1-1, ja ovdal bottu lei moallaerohus Yukon ja Sámi gaskkas 4-3, nuppi vuorus oaččuiga guktot vurrolagaid moala ja loahppaboađus lei Yukon 4-5. Nu ahte Sápmi vuittii 5-4, muitala Aslak Paltto. Son lohká hui olu geahččit rábmojedje leamaš buot gelddolamos spábbačiekčamat olles dán gilvvus.
– Mii vuittiimet Ruonáeatnama vuostá 4-1. Sofie Sörensen čievččastii spáppa guktii mollii, Kari Margareta Triumf deaivvai oktii ja Kristin Hamnvik deaivvai maid moala oktii, lohká FA Sápmi hárjeheaddji Ulrika Renstrøm.
Nieiddat leat hui čeahpit
Son muitala ovdal dáid spábbačiekčamiid ahte Sámi spábbačiekčannieiddat barget bures ovttas.
– Dássážii lea Sofie Sörensen čievččastan eanemus gerddiid spáppa mollii. Nieiddat leat hui čeahpit. Olusiin lea duođaid čalbmi spábbačiekčanspellui. Moallafákta Ann Heidi Utsi lea buot dáid čiekčamiidda bures ráhkkanan, muhto ii leamaš olu bargu go dat eará nieiddat leamaš čeahpit caggat spáppa beassamis su guvlui. Mii mannat šilljui dainna ulbmiliin ahte mii galgat vuoitit juohke čiekčama, lohká Ulrika Renstrøm.
Sámi spábbanieiddat eai leat vuoittáhallan dássážii. Otne lea semifinála ja bearjadaga finála ja doaivumis beassá Sápmi finálii.
