Sámediggeráđđi lea juolludan 460 000 ruvnno Riddu Riđđu festiválii.
Riddu Riđđu Festivála OS oažžu 460 000 ruvnno doarjjan festivála váldolávddi viiddideapmái, nu ahte šaddá sadji stuorát buvttademiide.
Sámediggeráđđi čállá ahte Riddu Riđđu lea bivnnuhis álgoálbmotfestivála gos lávejit fitnat máŋga duháha guossi juohke jagi. Festivála bargá mearrasámi kultuvrra oainnusmahttimiin ja ovddidemiin iežas kultuvrra ja earáid kultuvrraid ektui.
– Riddu Riđđu lea deaŧalaš kulturaktevra Sámis ja olles álgoálbmotmáilmmis. Dat leat deaŧalaččat sámi kultuvrii oppalaččat ja mearrasámi kultuvrii erenoamážit. Dasa lassin lea dat deaŧalaš báikkálaš ealáhuseallimii. Dat ahte mii leat mielde doarjumin dan lea iešalddis čielggas vai šattašii buorebun ja sáhtášii fállat vel buoret kulturvásáhusaid midjiide sámiide, álgoálbmogiidda ja eará mátkkálaččaide, dadjá sámediggeráđđi Silje Karine Muotka preassadieđáhusas.
