-Almmuhus-
-Almmuhus-
-Almmuhus-
OĐĐASAT45 jienain fidnii fas luohttámuša

45 jienain fidnii fas luohttámuša

-

-

Ellinor Marita Jåma joatká Norgga Boazosápmelaččaid Riikkasearvvi (NBR) jođiheaddjin.

Odne eahkes čađahii NBR riikasearvi jođiheaddji válgga.

45 jienain vuittii Ellinor Marita Jåma.

Su hástaleaddji lei Jan Ivvár Smuk guhte oaččui ovcci jiena.

Okta delegáhtta ii jienastan ii goappáge kandidáhta.

– Mun giittán luohttámuša ovddas. Mun giittán buot NBR miellahtuid geat leat dorjon ja sádden lihkkosávaldagaid. Giittán maid Jan Ivvár Smuka guhte hástalii mu jođiheaddjeválggas, dadjá Ellinor Marita Jåma.  Jienasteapmi lei čiegus.

Ellinor Marita Jåma ja Jan Ivvár Smuk.
 

Diđii ahte šattai váttis

Jan Ivvár Smuk ii loga iežas beahtahallan. Son lohká gilvu lei garas, muhto lei dehálaš geahččalit hástalit Ellinor Marita Jåma. 

Mun árvidan ahte šaddá hui váttis moatti beaivvis oažžut jorggihit riikačoahkkima. Mun háliidin geahččalit ja ráhkadit veaháš «gilvodeattu» organisašuvdnii. Lea nu ahte válga lea gilvu ja gilvu čavge olbmuid. Čájehit ahte earát maid háliidit fápmui ja ođđa geidnui lávket, dadjá Jan Ivvár Smuk.

Son sávvá lihku Ellinor Marita Jåmai viidásat bargguiguin jođihit Norgga Boazosápmelaččaid Riikkasearvvi.

NBR riikastivrras čohkkájit dál:

Ellinor Marita Jåma, Leif Anders Somby, Inge Even Danielsen, Eva Jåma, Berit Marie P. Eira, Tom Lifjell, John Anders Oskal ja Ánde Niilas Utsi.

NBR nuoraidlávdegotti jođiheaddji Per Thomas Oskal lea maid riikastivrras.

 
-Almmuhus-