Dal lea 44 olbmos Hurtigruten fatnasis dieđihuvvon koronadávda. Fanas lea borjjastan guovtti áigodagas, vuosttaš borjjasteapmi lei suoidnemánu 17. beaivvi gitta 24. beaivái, ja nubbi borjjasteapmi fas suoidnemánu 24. beaivvi gitta 31. beaivái.
Hurtigruten «MS Roald Amundsen» fatnasis leat dál dieđihuvvon njeallje ođđa koronabuohcci.
– Dál leat dieđihuvvon njeallje ođđa koronabuohcci mielčuovvuid searvvis, okta Oslos, guovttis Troanddimis ja okta Romssas ja Finnmárkkus. Dasto lei ikte ovtta bargis fatnasis gii ii lean vel ožžon vástádusa, muhto dál lea boahtán vástádus mii lei positiiva, muitala Álbmotdearvvašvuođainstituhta ossodatdirektevra Line Vold.
Gaskaboddosaš boađus «MS Roald Amundsen» fatnasa koronadilálašvuođas čájeha ahte lea 44 olbmui njommon koronadávda.
Dan 44 koronabuohccis leat 35 bargi, ja ovccis leat mielčuovvut. Sihke bargit ja mielčuovvut leat erremis, ja iešguđet báikkálaš dearvvašvuođabálvalusat galget čuovvut mielde sin geat leat leamaš fatnasis.
