Gáivuona váldodoavttir jáhkká ahte njoammunlohku lea badjelis go navdá ahte buohkat eai registrere ahte sis lea koronavirus.
Gáivuona suohkan dieđiha ahte leat registreren 44 ođđa koronanjoammuma mannan vahkkus. 39 olbmo leat ieža registrerehan njoammuma ja viđas leat testejuvvon suohkanis.
– Mii eat jáhke ahte buohkat registrerejit suohkana vuogádahkii ahte sis lea koronavirus, ja danin dáidet njoammunlogut badjelis, čállá Gáivuona váldodoavttir Anita M. Pedersen suohkana neahttasiidduin.
Ovddit vahkkus duođaštuvvo 15 koronanjoammuma, ja dan rájes lea njoammun badjel duppalastojuvvon.
– Olbmot geain lea koronavirus eai leat buohccán bahuid ja eai ge sii leat dárbbašan dearvvašvuođadivššu. Čájehuvvo ahte eatnašat geat leat ollásit boahkuhuvvon galget gierdat koronavirusa bures, cealká Pedersen.
Gáivuona váldodoavttir giitá olbmuid geat registrerejit njoammumiid suohkana neahttasiidduide, ja sávvá ahte olbmot jotket dáinna.
