Nenetsa autonomaguovllus Ruoššas álget njuovvanbarggut ihttin.
Nenetsa autonomaguovllus Ruoššas álget njuovvanbarggut ihttin.
Boazodoallofitnodat “Kharp” álgá ihttá beaivvi rájes njuovvanbargguid. Ovdal lei áigumuš njuovvagoahtit easka 15. beaivvi skábmamánus. Muhto fitnodagas gávnnahedje ahte leat ollu buorit sivat álggahit dán bárggu ovdal go galggai.
– Lei buorre dálki mannan geasi, iige lean báhkka geassi ja unnán čuoikkat ja lávžžát. Dasa lassin mannan geasi leat leamaš earenoamáš ollu guobbarat. Dainna lágiin bohccuin lei leamaš buorre dilli ja dáin lei doarvái borramuš. Dát visot lea vuođđun njuovvama álggaheapmái, muitalit “Kharp” boazodoallofitnodagas.
Juste dál lea eallu Krasnoe giláža luhtte. Oktiibuot galget njuovvat 4300 bohcco mii dahká sullii 120 duháha tonna bohccobierggu.
Nenetsa autonomaguovllus Ruoššas leat 14 kollektiivvalaš boazodoallofitnodaga ja ovcci priváhta bearašlágan fitnodaga.
Suoidnemánu vuosttaš beaivvi mielde Nenetsa autonomaguovllus rehkenaste 187 700 bohcco mii lea 3,7 duháha eanet diimmá ektui.
