-Almmuhus-
OĐĐASAT 40 miljovnna heahte­ruhtan boazo­dollui

40 miljovnna heahte­ruhtan boazo­dollui

-

-

Stuoradiggi lasihii 20 miljovnna ruvnno heahteveahkkin boazodollui, nugo ráđđehus bivddii bearjadaga. 

Stuoradiggi dohkkehii distaga ráđđehusa árvalusa lasihit boazodoalu heahtegearggusvuođafondii 20 miljovnna ruvnnuin.  

Lasiheapmi galgá veahkehit ealáhusa erenoamáš váttis dilis, ja láhčit dili buori elliidčálgui ja nannet boahttevaš buvttadeami. 

– Lean hui ilus go Stuoradiggi ná jođánit čuovvolii ráđđehusa árvalusa lasihit ruđa heahtegearggusvuođa fondii. Dál sáhttit veahkehit boazodolliid dán heahtedili čađa, dadjá eanandoallo ja biebmoministtar Olaug Bollestad preassadieđáhusas.

40 miljovnna oktiibuot

Dán dálvvi ja giđa lea ealádat vearáskan beaivvis beaivái. Boazodoalloeiseválddiid ođđaseamos raporttat árvvoštallet dán heahtedili bistit cuoŋománu lohppii, miessemánu álgui.

Mannan bearjadaga dat árvalii ráđđehus Stuordiggái ahte galggašii lasihit heahteruđa 20 miljovnnain, vai sáhtášii oastit ja fievrredit heahtefuođđariid ealuid.  Dáinna lassánemiin lea boazodoallošiehtadusas birrasiid 40 miljovnna mainna veahkehit boazodoalu dán goavi čađa. 

 Eanandoallo- ja biebmodepartemeanttas  čállet ahte buohkat geat leat ohcan doarjaga lassibiebmamii, ja geat leat ožžon dieđu sii ožžot doarjaga, ožžot doarjaga máksot ovdal beassážiid. 

250 tonna fuođđarat

Bearjadaga mearridedje ge Norgga boazosápmelaččaid riikkasearvi ja departemeanta sii juolludit ruđa fievrredeapmái Guovdageainnus ja Kárášjogas, ja bearjadaga de álge helikopterat doalvut fuođđarseahkaid ealuide.  Dál leat birrasiid 150 tonna vuddjon, ja mihttu lea doalvut 250 tonna fuođđariid ovdal beassážiid.

– Mu mielas lea dehálaš lágidit heahteveahki struktuvrraid bokte mat juo leat ásahuvvon. Šiehtadusbealit leat mearridan movt dákkár heahtebargu galgá čovdot ja NBR ja ráđđehus barget bures ja konstruktiivvalaččat ovttas. Eanandoallodirektoráhtta ja fylkkamánnit dat barget dáid bargguid mii mearriduvvo, ja sii leat ge juo bargan hirbmat ollu, meannudan ohcamiid vai boazodoallit ožžot doarjaga ovdal beassážiid. Jođánis máksin ja fievrredeapmi helikopteriiguin lea boađus dán ovttasbarggus, dadjá Olaug Bollestad. 

- Advertisement -
-Almmuhus-