-Almmuhus-
-Almmuhus-
OĐĐASAT 40 000 olbmo čorgejedje gáttiid

40 000 olbmo čorgejedje gáttiid

-

-

Mannan vahkkus čogge norgalaččat 46 tonna duobbara mearragáttiin, johkgáttiin ja jávregáttiin. Báddebihtát, isoporat ja sigareahttabázahusat nuoskkidit gáttiid eanemusat. 

Mannan vahkkus čorgejedje birrasii 40 000 olbmo Norgga rittu, johkgáttiid ja jávregáttiid. «Strandryddeuka» lea riikka stuorámus veahkkálasbargu mas eastadit nuoskkideami. 

Cuoŋománu 4. beaivvis gitta miessemánu 5. beaivái lágiduvvojedje oktiibuot 1350 čorgema. Vaikke dát lea 217 akšuvnna unnit go ovddit jagi, de nagodedje olbmo čoaggit 46 tonna doabbara. 

 – Giitosat buohkaide geat servet. Vuosttažettiin háliidan rámidit eaktodáhtolaččaid geat leat čorgen juohkelágan dálkkis. Leat maid hui giitevaččat go beassat doalvut ruskkaid nuvttá doapparfitnodagaide, dán doaibmabiju haga eat livčče sáhttán čađahit veahkkálasbarggu, dadjá Hold Norge Rent čorgengenerála ja Strandryddeuka jođiheaddji Fanny Pindsle.

 

50 jagi

Dán jagi ledje juohkán čorgenvahkku guđa fáddábeaivái, earret eará lágiduvvui skuvllaid ja mánáidgárddiid čorgenbeaivi, buokčalančorgen ja smávvaplastihkkabeaivi. 

 Hold Norge Rent čorgemat dáhpáhuvve miehtá Norgga, ja rahpandilálašvuođat dáhpáhuvve Geirangeris ja Harpefossas.

 – Min vuosttaš čorgenakšuvnnat dáhpáhuvve 50 jagi áigi Opplánddas, ja danin lei somá doppe álggahit gáddečorgemiid, dadjá Hold Norge Rent eananuoskkideami fágaovddasvástideaddji Mari Mo Osterheider. 

 

Eanemus báddebihtát

Gáddečorgema oktavuođas registrerejit olbmot gos čorgejit ja maid sii čogget luonddus. 

Dássážii leat olbmot registreren dáid doabbariid: 

5783 báddebihtá (eanaš fierbmebázahusat), 5303 isoporabihtá, 5019 sigareahttabázahusa, 3167 koarkka ja lohkki, 2960 plastihkkapuset, 2535 juhkanbohttala ja bovssa, 2015 sákki maiguin skurbá beljiid, 1786 stripsa ja skeaŋkabátti, 1453 biebmodoavnnji ja 1315 eanadoalloplastihka. 

- Advertisement -
-Almmuhus-