-Almmuhus-
-Almmuhus-
OĐĐASAT 39 olbmo heavva­nedje mannan geasi 

39 olbmo heavva­nedje mannan geasi 

-

-

Redningsselskapet dieđuid mielde heavvanedje mannan geasi 39 olbmo Norggas. Dat lea unnit go ovddit jagi ja diibmá. 

Eastadan dihte heavvanemiid, de lea Redningsselskapet oainnu mielde deháleamos oahpahit vuodjat, oahppat gádjut iežas ja máhttit heakka gádjut. 

Heavvaneamit fanasmátkkiin unnon

Vaikke mannan geasi leat erenoamáš ollu olbmot leamaš fatnasiin, de leat dat  heavvaneamit niedjan . Gaskal geassemánu ja borgemánu heavvanedje gávcci olbmo geat ledje fatnasis, mii lea beali unnit go diibmá. Buohkat geat heavvanedje fanasmátkkis ledje dievddut geat ledje boarrásabbot go 40 -jahkásaččat. Njeallje lihkohisvuođa gevve mearas, guokte jogas ja guokte jávrris. 

Heavvaneamit go gahččá gáttis lassánan

Mannan geasi heavvanedje 18 olbmo go gahčče gáttis čáhcái, ja diibmá eai heavvanan eará go guđas seamma sullii lihkohisvuođas. Guokte máná gahčaiga johkii ja merrii. Guokte dievddu heavvaneigga go leigga oaggume jogas, ja golmmas ges gahčče čáhcái ja heavvanedje go ledje tuvrras. Muđui eai dieđe siva vel daid eará heavvanemiide. 

Čieža lihkohisvuođa gevve jogas, gávcci mearas ja njeallje jávrris. 

– Oktiibuot de leat eambbosat heavvanan sáivačáhcái go merrii. Dat lea muittuhus ahte álot ferte smiehttat mii sáhttá leat váralaš go lea jođus lahka čáziid, dadjá Tanja Krangnes preassadieđáhusas. 

Mánát ja nuorat váraleamos dilis 

Logi olbmo heavvanedje go ledje lávggodeame dahje gálašeame mannan geasi. Sin searvvis ledje čiežas vuollel 25 jagi boarrásat, ja okta lei  badjel 50-jahkásaš  ja guovttis ges badjel 70-jahkásaččat. Ovccis dan logi olbmos ledje dievddut. Dan logi lávggodan- dahje gálašanlihkohisvuođas gevve golbma jogas, njeallje jávrris ja golbma mearas. 

– Dán ge geasi leat oaidnán ahte mánát ja nuorat leat váraleamos dilis go leat vuojadeame, lávggudeame dahje gálašeame. Jus ii galgga okta ge mánná Norggas heavvanit, de lea dehálaš ahte suohkanat ja skuvllat gehččet bearrái ahte oahpaheddjiin lea rievttes máhttu ja doarvái áigi mat leat mearriduvvon vuodjanoahpahussii dadjá  Krangnes.

Oahpahusplána

Dan ođđa oahpahusplánas lea mihttu ahte mánát ohppet oadjebasat leat čázevuolde, ja vuodjan, iežas gádjun ja heaggagádjun galget ge oahpahuvvot sihke siste ja olgun gos eanaš lihkohisvuođat gevvet ge.  Mannan geasi leat ge eambbosat heavvanan go olbmot geat dušše johtolatlihkohisvuođain, namalassii 27 olbmo dušše johtolagas ja 39 olbmo ges heavvanedje. 

-Almmuhus-