Juohke njealját norgalaččas leat allergiijasullasaš dávdamearkkat juovllaid áiggi ja lohku lea lassánan.
Dan čájeha iskkus man analiisafitnodat YouGov lea čađahan Allergiguiden ovddas. Iskkus čájeha maid ahte Romssa ja Finnmárkku fylkkas lea 39 000 olbmos juovlaallergiija mii máksá ahte sii eai gierdda čiŋaid ja hájaid mat mis leat juovlabasiid áiggi. Dábálamos lea nu gohčoduvvon givssideaddjiáđat, nu go juovlarásit, juovlamuorat, gavjjat boares juovlačiŋain ja suovas. Juovlaallergihkkárat sáhttet maid leat hearkkit juovlamáisttahájaid, adveantačuovggaid ja buhtistanáđaid vuostá, čállá Allergiguiden preassadieđáhusas.
Juovlaallergiija dávdamearkkat leat dábálaččat snuolggideapmi, gasttáhat ja čalmmit mat sakŋidit, muhto Allergiguidena iskkus čájeha ahte olusat vásihit ahte njunni sakŋida, čalmmit ruččagit ja ganjaldit. Dáid juovlaallergiija dávddamearkkaid sáhttá malssidit vuoiŋŋahatvulššiin, nu go nurvuin, golgodávddain dahje koronain.
– Vuoiŋŋahatvuolši bistá ovtta gitta guokte vahkku, muhto allergiija dávdamearkkat bistet nu guhká go lea givssideaddjiáđaid láhka. čillge doavttir Anders Østrem.
– Feber ii leat allergiijamearka, čilge dábálašmedisiinnalaš spesialista, doavttir Anders Østrem ja rávve olbmuid, geain leat allergiija dávdamearkkat, fitnat doaktára luhtte.
