3862 oasusfitnodaga gokče uvssaid loahpalaččat diibmá. Dat lea 2,6 proseantta lassáneapmi 2018 rájes, go 3764 fitnodaga reastaluvve, čájehit varas logut.
Dušše juovlamánus reastaluvve 289 oasusfitnodaga Norggas, mii lea 8,24 proseantta lassáneapmi 2018 ektui, go 267 fitnodaga reastaluvve.
Experian fitnodaga vuovdindirektevra Per Ivar Kristiansen dadjá preassadieđáhusas ahte lea earenoamážit okta suorgi mii ražai diibmá.
– Huksen- ja rusttetsuorggis, mas lea garra gilvu, haddedeaddu ja obbalaččat unnán dienas lea dat suorgi mas proseanttaid mielde leat lassánan reastaluvvamat. 2018:s reastaluvve dan suorggis 899 fitnodaga, 2019:s lassánii lohku 9,34 proseanttain 983 fitnodahkii mat reastaluvve, dadjá son.
Unnit reastaluvvamat gálvogávppiin
Gálvogávppiid suorgi lea leamaš dat suorgi mas leat eanemus reastaluvvamat leamaš ovdal. Dál lea dan suorggis buorránan dilli veaháš go reastaluvvanlohku unnu. Oktiibuot 944 fitnodaga reastaluvve dan suorggis, mii lea 30 unnit go 2018:s.
– Dat leat buorit logut suorggis mii lea rahčan guhkit áiggi, dadjá Kristensen.
Ijastallan- ja guossohanfitnodagat maid rahče veaháš, go reastaluvvamat lassánedje 1,59 proseanttain. Kristiansen dattetge oaidná buriid beliid dan suorggis, go juovlamánus ledje 5,26 proseantta unnit reastaluvvamat go seamma mánus 2018:s.
