Maŋemuš guoktelogiovtta jagis leat 1 174 olbmo massán heakka buollimis Norggas. Lohku livčče sáhttán olu alladeabbo, jus buollinbiškkonat eai livčče viesuin.
Juovlamánu vuosttaš beaivi lea Buollinbiškkonbeaivi. Dát beaivi lea muittuhan dihte olbmuid iskat doaibmá go buollinbiškkon, ja molsut bahtteriid das.
Dássážii dán jagi leat 32 olbmo duššan buollimis Norggas. Buollinbiskkonbeaivi lea Norsk brannforening, servodatsihkarvuođa ja gearggusvuođa direktoráhtta, Gjensidige, Báikkálaš el-bearráigeahču ja buollin- ja gádjundoaimmahaga ovttasbargu.
– Oidno dáin loguin ahte unnit ja unnit olbmot duššet buollimis. Dan oaidnit maŋemuš guoktelot jagi loguin, muitala servodatsihkarvuođa- ja gearggusvuođa direktoráhta (SGD) ossodatjođiheaddji Johan Marius Ly preassadieđáhusas.
Son muitala viidáset ahte buollinbiškkon sáhttá gádjut heakka, ja lea buot deháleamos doaibmabidju ruovttuin.
– Buohkat galggašedje buorebut jurddašit ruovttu buollinsihkarvuođa. Deháleamos lea ahte buollinbiškkonat doibmet, ja ahte eanaš lanjain leat dakkárat. Buollinbiškkonat galget gullot viesuin, maiddái go gokčá uvssaid, muitala Gjensidige buollinekspearta Rune Siewartz Nielsen.
Buohkat galget gullat go biškugoahtá
Buot viesuin galget buollinbiškkonat, ja juohke gearddis galggašii juobe okta. Biškkoniid galgá gullat juohke lanjas, maiddái dalle go gokčá uvssaid.
Ávžžuhuvvo maid ahte oađđenlanjain leat buollinbiškkonat.
Ávžžuhuvvo maiddái ahte leat buollinbiškkonat mat álget oktanaga biškut, erenomážit jus orru viesus mas leat máŋga gearddi.
