Ráđđehus áigu nannet dearvvašvuođabálvalusaid mánáide, nuoraide ja sin bearrašiidda.
Ráđđehus dieđiha ahte juolludit dán jagi 952,5 miljovnna ruvnno suohkaniidda mat suohkanrámma čađa galget nannet dearvvašvuođabálvalusaid mánáide ja nuoraide. Dasa lassin boahtá vel 379,7 miljovnna ruvnno merkejuvvon ruhtan dearvvašvuođaguovddážiidda ja skuvladearvvašvuođabálvalussii.
– Vuođđu buori dearvvašvuhtii huksejuvvo árrat. Dearvvašvuođaguovddážat ja skuvladearvvašvuođabálvalusat váikkuhit árrat oadjebasvuođa ja loaktima, ja eastada fysalaš ja psyhkalaš bárttiid. Koronapandemiija lea vel čielgaseappo čájehan man dehálaččat dát bálvalusat leat. Mun lean hui ilus go suohkanat áŋgiruššet dán fálaldahkii, dadjá dearvvašvuođa- ja fuolahusministtar Ingvild Kjerkol.
Jorttamovrraide merkejuvvon ruhta
Dearvvašvuođadirektoráhtta lea juohkán merkejuvvon ruđaid ohcama mielde. 296 ohcama 2021-2023 áigodahkii leat addon viidáset. Dasa lassin leat 17 ođđa suohkana, ja okta gaskasuohkanlaš ovttasbargu ožžon doarjaga. Lea maid biddjon sullii 99 miljovnna ruvdno 120 jorttamovrra jahkedoaimmaide.
– Mii áigut loktet psyhkalaš dearvvašvuođa fálaldagaid miehtá riikka. Danne leat bidjan ceahkkálastinplána. Galgat geahččat sihke mii ovddida buori psyhkalaš dearvvašvuođa, ja bargat dan guvlui ahte veahkki lea eanet olámuttos olbmuide. Dehálaš oassi das lea nannet dearvvašvuođaguovddážiid ja skuvladearvvašvuođabálvalusaid, muitala Kjerkol.
Dielddanuori suohkan, Hársttaid suohkan, Ráissa suohkan ja Romssa suohkan leat muhtun suohkanat maidda juolluduvvui ruhta.
