Romssas njoammu koronavirus eanet go goassege ovdal, muhto maŋimuš guokte jándora eai leamaš njoammunlogut seamma badjin go eará beivviid mannan vahkkus.
Romssas duođaštuvvojedje bearjadaga 18 ođđa koronanjoammuma, lávvardaga 10 ja sotnabeaivvi 3. Dat mearkkaša ahte koronavirus lea njommon 31 olbmui mannan vahkkoloahpa.
Vaikke koronavirus leavvá eanet go goassege ovdal, de ii leat Romssa suohkan oaidnán vel dárbbu ásahit sierra njoammuneastadandoaimmaid go koronavirus orro njoammumin dihto birrasis.
Eanaš koronabuohccit leat studeanttat geaid čatnet Driv studeantaolgobáikái, gos koronavirus njoamui viidát miessemánu loahpas ja geassemánu álggus. Dál duođaštuvvo maid koronavirus dáid olbmuid lagasoktavuođain.
Romssa suohkanis leat oktiibuot 87 olbmo isolašuvnnas ja 507 olbmo erremis.
