-Almmuhus-
SMÁVVAOĐĐASAT300 milljovnna skuvlagirjjiide

300 milljovnna skuvlagirjjiide

-

-

Ráđđehus háliida buoret dássedeaddu girjji ja šearpma gaskka skuvllas ja evttoha dál nuppes várret ruđaid oahppogirjjiide.

300 miljovnna ruvnnuin ožžot oahpit miehta Norgga badjel ovtta miljovnna eanet oahppogirjjiide.

– Mis galgá buoret dássedeaddu šearpma ja girjji gaskka Norgga skuvllain vai oahppit ohppet eanet ja buorebut. Danne ráđđehus dál veahkeha gielddaid dáinna nana doaimmain, dadjá máhttoministtar Kari Nessa Nordtun (Bargiid bellodat) preassadieđáhusas.

Lea suohkaniid ovddasvástádus fuolahit ahte ohppiin leat dárbbašlaš oahpponeavvut. Dán liige doarjagii sáhttet sii gaskamearálaččat oastit unnimusat beannot ođđa oahppogirjji juohke oahppái 1.-10. dássái.

– Ruđat leat merkejuvvon, vai buot váhnemat, oahpaheaddjit ja oahppit sáhttet leat oadjebasat dasa ahte sii ožžot eanet ođđa oahppogirjjiid, beroškeahttá gieldda vuoruhemiin boahtte skuvlajahkái, dadjá Nordtun.

Ráđđehus lea vuoruhan várrejuvvon ruđaid oahpponeavvuide guovtti ođasmahtton bušeahtas. Nu ii leat goassege ovdal dahkon. 

Ohppet buorebu oahppogirjjiin

Maŋimus jagiid riikkaidgaskasaš guorahallamat čájehit balddihahtti oahppobohtosiid Norgga skuvllain. Dutkan čájeha guhkit teavsttaid lohkan ovddida lohkanmáhtu mii lea váddásit šearpmas go girjjiin.

– Mii leat sakka fuolastuvvan go mánáid ja nuoraid lohkanmáhttu, lohkanvierut ja miellaguottut lohkamii leat rievdan negatiivvalaččat. Dan mii áigut rievdadit ja oahppogirjjiid fidnen lea okta máŋgga doaimmas maid ráđđehus bargá, lohká Nordtun.

Váhnemat ja oahpaheaddjit váillahit eanet oahppogirjjiid

Gielddat ožžo buhtadusa oahpponeavvuid oastimis fágaođasmahttima várás, muhto pandemiija geažil leat olu dáin ruđain mannan digitála oahpponeavvuide.

– Mii diehtit ahte olu oahpaheaddjit ja váhnemat háliidit eanet iešguđetlágan oahpponeavvuid vai oahpahusa sáhttá heivehit ohppiidjovkui. Oahpaheaddji diehtá buoremusat goas heive geavahit oahppogirjjiid ja goas šearbma lea buoremus, muhto sus ferte leat válljenmunni. Dál eai leat doarvái oahppogirjjit máŋgga skuvllas, lohká Nordtun.

Ráđđehus áŋgiruššá lohkamiin

Ráđđehus lea álggahan máŋga ulbmillaš doaibmabiju buoridan dihtii lohkama ja lohkanilu.

– Lohkanvierut ja guottut lohkamii leat rievdan negatiivvalaččat. Mii bidjat danin johtui dakkár doaibmabijuid mat doibmet buoremusat ja mat sáhttet buoridit geainnu oahpahussii ja leat mielde unnideamen erohusaid mánáid ja nuoraid gaskka, lohká máhttoministtar Kari Nessa Nordtun.

-Almmuhus-