Sámediggeráđđi lea juolludan daid ruđaid stipeandan oktiibuot 541 oahppái geain lea sámegieloahpahus joatkkaskuvllas oahppojagi 2022/2023.
– Movttiidahttin dihte nuoraid válljet sámegiela fágan joatkkaskuvllas, juolluda Sámediggi stipeandda ohppiide geain lea sámegiella fágasuorggis. Oahppit geat válljejit sámegiela vuosttašgiellan vuoruhuvvojit bajimussii, dadjá sámediggeráđđi Mikkel Eskil Mikkelsen (NSR) preassadieđu bokte.
541 stipeandaoažžu leat:
– 216 oahppi geain lea sámegiella vuosttašgiellan leat ožžon 10 000 ruvnno stipeandan. – 73 oahppi geain lea sámegiella nubbegiellan – Sámegiella 2, leat ožžon 6 000 ruvnno stipeandan. – 252 oahppi geain lea sámegiella nubbegiellan – Sámegiella 3 dahje Sámegiella 4, ja geain lea sámegiella amasgiellan leat ožžon 3 500 ruvnno stipeandan.
Mannan skuvlajagis ledje 544 oahppi geat ožžo dán stipeandda.
