Máttá-Sámi musea Saemien Sijte oažžu 29,8 miljovnna stáhtabušeahtas.
2021 čavčča galget plánas Saemien Sijte Mátta-Sámi musea ja kulturguovddáža ođđa vistti uvssat rahppot. Ráđđehusa diimmáš stáhtabušeahtas oaččuige Saemien Sijte lohpádusa oažžut 115 miljovnna ruvnnu vistehuksemii. 2019 stáhtabušeahtas oaččuige Saemien Sijte 6 miljovnna huksemii ja 2020 stáhtabušeahtas juolludii ráđđehus 29,8 miljovnna Saemien Sijtii.
Lagabut ollašuhttit
Saemien Sijte direktevra Birgitta Fossum beasai diibmá rahpat Champagne stáhtabušeahta oktavuođas ja son illuda dál go ráđđehus joatká ruhtajuolludemiin.
– Dat addá buori dovddu ja mis lei jáhkku ahte ráđđehus joatká ruhtademiin. Mii oaččuimet diibmá 6 miljovnna álggahit huksenbargguid ja lea buorre go mii leat mielde dán jagáš stáhtabušeahtas, lohká Fossum.
De viimmat
Plánaid mielde galgá Statsbygg geiget čoavdagiid Saemien Sijtii juovlamánu 2021.
– Maŋŋá nu máŋga jagi, go leat bargan ja rahčan oažžut ođđa vistti, de addá dat nu buori dovddu. Viimmat galgá dat ollašuvvat, dadjá Saemien Sijte direktevra Birgitta Fossum.
Badjelaš 30 jagi lea Saemien Sijte bargan ođđa Mátta-Sámi musea ja kulturguovddáža ásahemiin
Mátta-Sámi báikái Snoasai.
Eará sámi museat eai ožžon ruhtadeami ráđđehusa 2020 bušeahtas.
