Sámediggeráđđi lea juolludan doarjagiid sámi oahpponeavvuid ovdánahttimii mat vuhtiiváldet ođđa oahppoplána áigumušaid. Stuorámus oassi lea addon sámegiel fágaid oahpahussii ja oahpponeavvuide mat gokčet fágaidrasttideaddji fáttáid.
Sámediggi čállá preassadieđáhusas ahte lea dán jagi vuoruhan oahpponeavvuid sámegiellafágaide, davvi-, julev- ja lullisámegielaide. Erenoamážit heivehuvvon oahpponeavvuin leat vuoruhan fágaid: sámegiella, servodatmáhttu ja servodatfága. Dasa lassin lea vuoruhan oahpponeavvuid fágaidrasttideaddji fáttáin álbmotdearvvašvuohta ja eallimis birget, ja demokratiija ja borgárvuohta. Earret fágaid, de lea Sámediggi vuoruhan digitála oahpponeavvuid ja oahpponeavvuid mat gárvánit jođánit.
– Mii leat buori muddui ollašuhttán min 2021 áigumušaid, dadjá sámediggeráđđi Mikkel Eskil Mikkelsen (Norgga Sámiid Riikkasearvi – NSR), gii lea movttet go Sámediggi oaččui olu buriid ohcamušaid man ulbmil lea nannet ja ovddidit sámegiela ja sámi oahpahusa boahtteáiggi.
Ilus doarjagiin julevsámegiela oahpponevvui
Sámediggi lea dorjon čieža oahpponeavvoprošeavtta sámegiella vuosttaš- ja nubbingiellan fágii, davvi-, julev- ja lullisámegielas. Dasa lassin leat dorjon julevsámegiela luonddufága oahpponeavvu 1.- 4. jahkecehkiide. Sámediggeráđđi Mikkelsen lea ilus go lei vejolašvuohta doarjut jorgaleami julevsámegillii.
– Lea stuora dárbu julevsámegiela oahpponeavvuide buot dásiin, sihke vuosttaš- ja nubbingielagiidda. Lea dárbu ahte gávdnojit oahpponeavvut mat huksejit ja nannejit ohppiide buori vuođu doahpagiin ja gielas. Stuora ovdamunni prošeavttas lea ahte prošeakta lea vuolggahuvvon julevsámi skuvlaárgabeaivvi dárbbuid vuođul ja prošektii leat čadnon oahpaheaddjit julevsámi guovllus, dadjá Mikkelsen preassadieđáhusas.
Dán jagi juolludemiin lea Sámediggi maiddái dorjon vihtta prošeavtta mat gokčet Sámedikki vuoruhuvvon fágaidrasttideaddji fáttáid, ja dat ráhkaduvvojit golmma sámegillii. Dát prošeavttat fátmmastit viidát, olles vuođđoskuvlla ja joatkkaoahpahusa. Dasa lassin sáhttet muhtin oahppomateriálat maid geavahuvvot mánáidgárddiin. Fágaidrasttideaddji fáttat leat ođđa oasit oahppoplánaid bajitdásis.
Hástalusat
Sámediggi lea maid juolludan doarjaga guovtti erenoamáš heivehuvvon oahpponevvui. Sámediggi lea maŋemus jagiid ožžon unnán ohcamiid erenoamážit heivehuvvon oahpponeavvuid ráhkadeapmái.
– Dát lea hástalus maid Sámediggi berre čuovvulit Statpedain/Sámi earenoamášpedagogalaš doarjalusain, ja geahčadit movt galgá láhčit dili vai buorrána oahpponeavvoráhkadeapmi dan ohppiidjovkui, dadjá Mikkelsen.
Sámediggi lea dán jagi ohcanvuđot doarjjajuolludeamis čuovvulan Sámedikki oahpponeavvoráhkadeami doaibmaplána. Dađi bahábut eai álo boađe ohcamušat buot fágaide maid Sámediggi lea vuoruhan.
– Doaibmaplána galgá dál ođastuvvot dárbbuid mielde. Lea dehálaš bargu gulahallat geavaheddjiiguin makkár dárbbut leat ja makkár fágaide ovddemus ferte vuoruhit doarjaga boahtteáiggis, dadjá Mikkelsen.
